Өймөкөөн улууһугар тыа хаһаайыстыбатын эйгэтин сүрүннүүр көрүҥүнэн сылгыны үөрдээн иитии буолар.
2024 сыл тохсунньу 1 күнүнээҕи туругунан улууска сылгы ахсаана 3 846 төбө. Манна федеральнай таһымнаах лицензиялаах үс племенной хаһаайыстыба баар: “Өймөкөөн” ХЭТ, сылгытын ахсаана 395; “Тонор” ТХПК – 405, “Полюс холода” ТХПК – 251 сылгыны туталлар.
Улууска таба ахсаана 10 тыһ. кэриҥэ, онтон 5 122 табаны “Үчүгэй” ААУо тутар. Бу тэрилтэ эмиэ Арассыыйатааҕы лицензиялаах племенной хаһаайыстыбанан буолар. Улуус аҕа ууһунан общиналара холбоон 3 583 табаны иитэллэр. Племенной үлэни сайыннарарга былырыын сылгыны оройуон иһигэр эрэ атыыга таһаарбыттара. Оттон быйыла племенной табаны, сылгыны улуус таһыгар атыылыыр үлэ сөргүтүөллүөҕэ диэн иһитиннэрдэ салайааччы.
Улууска кэлиҥҥи сылларга ынах сүөһү ахсаана аччаабыта бэлиэтэнэр. Оройуон бары хаһаайыстыбаларыгар холбоон 931 хороҕор муостааҕы иитэн туруораллар.
— Биһиги улууспутугар усулуобуйа уустугун учуоттаан туран, 2023 с. оттооһун былаанын 80% толордубут. Сорох племенной хаһаайыстыбалар окко былааннарын кыайан толорботохторо. Онон тастан көмө көрүллэн, 262 тонна оту тиэйтэрии барар. Эмиэ итиччэ тонна сенаж уонна 106 тонна комбикорм көрүллүөхтээх. Онон кыстыгы туораан, этэҥҥэ күөххэ үктэниэхпит, — диэн бэлиэтиир Руслан Атласов.
Р.М. Атласов улууска тыа хаһаайыстыбатын эйгэтэ сайдар кэскиллээх диэн санаалаах. Сылгы базаларын тупсарыыга, табаһыттары өйөөһүҥҥэ үлэ барар. Нүөлсүтүүгэ уонна аҕыйах сыллаах үүнээйини үүннэриигэ болҕомто ууруллара былааннанар. Маны тэҥэ салайааччы ыччат дьону тыа хаһаайыстыбатыгар тардарга күүстээх үлэ барыан наадатын ыйар. Ордук ынах сүөһүнү иитиигэ. Бу түргэнник дохуот киллэринэр көдьүүстээх көрүҥнэртэн биирдэстэрэ буоларын дьон өйдүөн наада.
Тыа киһитэ олохтоох бородууксуйата суох сатамматын өйдөөн туран, өбүгэ саҕаттан кэлбит төрүт дьарыкпытын ыһыктыбакка, инники кэскили санаан туран үлэлиир-хамсыыр соруктаахпыт.
Любовь Кривошапкина