Дьокуускайга кулун тутар 29 күнүгэр өрөспүүбүлүкэтээҕи тыа хаһаайыстыбатын кэпэрэтииптэрин сийиэһэ буолаары турар. Ол иннинэ икки күн устатыгар дэлэгээттэргэ анаан стратегическай сиэссийэлэр уонна үөрэтэр сэминээрдэр ыытыллыахтара. Бүгүн сарсыарда бэлиэтэммитинэн, өрөспүүбүлүкэ 30 улууһуттан уонна киин куораттан 151 дэлэгээт кэлбит.
Үс күннээх дьаһал барыта Аартыкатааҕы судаарыстыбаннай агротехнология университетын базатыгар тэриллэр. Бүгүҥҥү тэрээһин икки сиринэн саҕаланна: “Олохтоох оҥорон таһаарыы: харгыстар уонна кэскил” диэн тиэмэҕэ стратегическай сиэссийэни тыа хаһаайыстыбатын уонна ас-үөл бэлиитикэтин миниистирэ Артем Александров, үөрэтэр сэминээри миниистири солбуйааччы Николай Афанасьев арыйдылар. Онтон стратегтар биэс былаһаакканан арахсан үлэлээтилэр. Манна улуустардааҕы кэпэрэтииптэр бэрэстэбиитэллэрин олорор түөлбэлэринэн (Бүлүү умнаһа, илин эҥээрдээҕи уонна хотугулуу-илиҥҥи, киин, соҕуруу уонна соҕуруулуу-арҕаа, хотугу) көрөн араардылар.
Сэминээр үлэтин Москубаттан “Агрохонтуруол” Арассыыйатааҕы бэйэтин сүрүннэнэр тэрилтэ – тыа хаһаайыстыбатын кэпэрэтииптэрин ревизиялыыр сойуустарын түмсүүтүн бэрэсидьиэнэ Андрей Морозов баһылаан-көһүлээн ыытар. Сэминээргэ Андрей Валерьевич тыа хаһаайыстыбатын потребительскай кэпэрэтииптэрин аналларын, кэпэрэтииптэри тэрийии уонна үлэлэтии ирдэбиллэрин, паай пуондатын үөскэтии тустарынан, оттон потребительскай кэпэрэтиип сүрүн үлэтин-хамнаһын итиэннэ урбаан үлэтин уонна судаарыстыба үбүнэн өйөбүлүн арааран учуоттааһыны “М.О.С.К.В.У.” ТХПК бэрэссэдээтэлэ Галина Явкина быһааран кэпсээтилэр.
Сарсын сэминээр үлэтин салгыаҕа. Ити кэмҥэ тыа хаһаайыстыбатын кэпэрэтииптэрин бэрэстэбиитэллэрэ агротехнология университетын быйыл үөрэнэн бүтэрэр эдэр исписэлиистэргэ анаан үлэ миэстэтинэн хааччыйыыга дьаарбаҥка тэрийиэхтэрэ. Үһүс түмүктүүр күҥҥэ СӨ бырабыыталыстыбатын бэрэссэдээтэлин солбуйааччы Сергей Местников бырабыыталыстыба 1-кы №-дээх дьиэтигэр тыа хаһаайыстыбатын кэпэрээссийэтин тиһигин сайыннарыыга туһуламмыт сүрүннүүү сүбэ мунньаҕын салайан ыытыа. Күнүскү чэйтэн киэһэ дэлэгээттэр сийиэс пленарнай мунньаҕар кыттыахтара.
Саха Өрөспүүбүлүкэтин үрдүнэн, бу дьыл тохсунньу 1 күнүнээҕи туругунан, федеральнай нолуок сулууспатын учуотугар 438 тыа хаһаайыстыбатын потребительскай кэпэрэтиибэ турар. Олору сэргэ 187 тыа хаһаайыстыбатын производственнай кэпэрэтиибэ үлэлиир.
Василий Никифоров
Анна Сергучева (ТХМ пресс-сулууспата) түһэриилэригэр: СӨ тыа хаһаайыстыбатын потребительскай кэпэрэтииптэригэр үлэлиир салайааччыларга, исписэлиистэргэ аналлаах стратегическай сиэссийэ уонна үөрэтэр сэминээр түгэннэриттэн.