Дойду бэрэсидьиэнэ Владимир Путин тыа сиригэр олорор, үлэлиир дьоҥҥо улахан болҕомтотун өрүүтүн уурар.
РФ Тыа хаһаайыстыбатын министиэристибэтин иһинэн аграрийдары өйүүр элбэх судаарыстыбаннай бырагыраамалар үлэлииллэрин туһунан кини 2023 с. ахсынньы 14 күнүгэр сылы түмүктүүр мунньахха этэн турар.
Онон тыа хаһаайыстыбатынан дьарыктанар дьон миэстэтигэр кинилэргэ сөп түбэһэр бырагыраамаҕа киирсэн, өйөбүлүнэн сөптөөхтүк туһаналларыгар бары кыах баар.
Өймөкөөн улууһунааҕы Тыа хаһаайыстыбатын чахчыларынан, улууска “Үчүгэй” ААУо, “Өймөкөөн” уонна “Полярная империя” ХЭТ, племенной сылгыны иитэр “Тонор”, “Силис. Полюс Холода”, “Өймөкөөн” ХЭТ, сэттэ аҕа ууһунан община, 29 бааһынай хаһаайыстыбата, ону тэҥэ 194 кэтэх хаһаайыстыбалаах дьон олохтоох бородууксуйаны оҥорон таһаарыынан дьарыктаналлар.
Бары категориялаах хаһаайыстыбаларга 931 ынах сүөһү, ол иһигэр 400 ыанар ынах баар. Ынах сүөһү ахсаанын элбэтэргэ туһуланан кэтэх хаһаайыстыбалаахтарга 1 төбөҕө 37 тыһ. солк., бааһынайдарга 45 тыһ. солк. көмө судаарыстыбаттан көрүллэр.
Сыл аайы халаан уутуттан, ойуур баһаарыттан сылтаан оттооһун былаана туолуута төһө даҕаны уустуктардааҕын иһин, улууска сылгыны үөрдээн иитии салаата салгыы сайдарыгар тустаах болҕомто ууруллар.
2024 с. тохсунньу 1 күнүнээҕи туругунан сылгы ахсаана 3846 тэҥнэһэр
Өймөкөөн улууһугар аҕыйах ахсааннаах норуоттар түөлбэлээн олороллор. Таба ахсаанын элбэтии, үгэскэ кубулуйбут дьарыгы чөл хаалларыы эйгэни сайыннарыы биир сүрүн соругунан буолар. 2024 с. тохсунньу 1 күнүнээҕи туругунан хаһаайыстыбаларга таба ахсаана 347 төбөнөн улаатта, ол эбэтэр 9467 буолла (110,4% тэҥнэстэ).
Дьылыттан көрөн тыа хаһаайыстыбатын бородууксуйатын оҥорон таһаарааччыларга тустаах көмө оҥоһуллар. Ол курдук, улуус таһыттан оту, эбиэһи, комбикорму тиэйтэриигэ өрөспүүбүлүкэ өттүттэн тустаах өйөбүл баар.
Любовь Кривошапкина