Уматыгынан хааччыйар “Сибойл” хампаанньа бэҕэһээҥҥиттэн, от ыйын 18 күнүттэн, бэнсиин сыанатын ыараппыт, ол курдук АИ-95-тээҕи 62, 20, АИ-92-лээҕи 59 солкуобайга диэри өрө таһаарбыт буоллаҕына, өрөспүүбүлүкэ тыа хаһаайыстыбалаах улуустарыгар сапыраапкалардаах “Туймаада-Ньиэп” АУо бүгүн сарсыарда 9 чаастан сыанатын лаппа үрдэтэн, тимир көлөлөөхтөрү “үөртэ”.
“Туймаада-Ньиэп” АУо генеральнай дириэктэрин Степан Чепалов бирикээһигэр олоҕуран, бүгүн сарсыардаттан хампаанньа Дьокуускай куоракка уонна Марха түөлбэтигэр баар сапыраапкаларыгар Премиум-95-тээх бэнсиин сыаната 5 солкуобайынан ыаратыллан, 62 солк. 70 харчыга (эрдэ 57 солк. 70 харчы этэ), Регулятор-92-лээх 60 солк. 90 харчыга (56 солк. 80 харчы этэ) тиийэ өрө тэптилэр. Оттон сэлээркэ онуоха-маныаха диэри эрдэтээҥи сыанатынан, 76 солк. 70 харчынан, хаалла.
Хампаанньа уматыгын уурар-хаһаанар базата баар Аллараа Бэстээххэ уонна Майаҕа сыана арыый намыһах: 95-тээх 60 солк. 90, 92-лээх 57 солк. 90 харчыга атыыланаллар. Мантан ураты Чурапчы, Таатта, Уус Алдан, Хаҥалас, Амма, Кэбээйи, Ньурба, Бүлүү, Үөһээ Бүлүү улуустарыгар үлэлиир сапыраапкаларыгар сыана, киин куорат киэнин кытта тэҥнээтэххэ, 10 харчыттан саҕалаан 1 солк. 80 харчыга тиийэ үрдээтэ. Холобур, Чурапчы сэлиэнньэтинээҕи ыстаансыйаҕа 95-тээх 62 солк. 80 харчыга, 92-лээх 61 солк. 10 харчыга атыыланар буоллахтарына, Кэбээйи сэлиэнньэтигэр туһааннааҕынан 64 солк. 30 харчы уонна 62 солк. 70 харчы сыаналаахтар. Оттон хампаанньа хоту эҥээргэ соҕотох сиргэ, Өймөкөөн Уус Ньаратыгар, үлэлэтэр сапыраапкатыгар Премиум-95-тээх бэнсиинсыаната 79 солкуобайга тиийдэ, 1 лиитирэ сэлээркэ иһин 95 солкуобайы төлүүгүн.
“Туймаада” АУо салалтата сыананы үрдэппитин уматык атыылаһар собуоттара сыананы таһаарбыттарын кытта ситимниир.
Василий Никифоров. Хаартыска: tuneft.ru