Алтынньы 17 күнүттэн киинэ тыйаатырдарыгар биир дойдулаахпыт Михаил Лукачевскай «Триумф» («Өрөгөй») киинэтэ тахсаары турар. Бу киинэ улууканнаах тренер Дмитрий Коркин төрөөбүтэ 95 сылыгар ананар диэн кэпсиир «Мүрү саһарҕата» хаһыат.
Манна 1976 сыллаахха Монреаль куоракка буолбут Олимпийскай оонньуулар чыпчаалларыгар тахсыбыт кини үөрэнээччилэрин Роман Дмитриев, Павел Пинигин, Александр Иванов кыайыыга кынаттыыр историялара көстүөҕэ.
Киинэҕэ ССРС үтүөлээх спорт маастара Павел Пинигин оҕо эрдээҕинээҕитин оруолун Дьокуускайдааҕы Саха политехническай лицей 6-с кылааһын үөрэнээччитэ Айсар Троев толордо. Кини төрөппүттэрэ Уус Алдантан төрүттээхтэр: аҕата Антон Анатольевич – Тулунаттан, оттон ийэтэ Анна Михайловна – Бороҕонтон.
Айсар төһө да куоракка олордор, Тулунаҕа уонна Бэйдиҥэҕэ эһэлээх эбэтигэр сайылыыр. Дэриэбинэ олоҕор буһан-хатан, оттоһон оҕо саас дьоллоох сайынын билэр. Кыра сааһыттан «Бриллианты Якутии» ансаамбылга үҥкүүлүүр.
Кини сахалыы киинэлэри сэҥээрэн көрөр буолан, киинэ артыыстарын, кинилэр хайдах оонньуулларын олус интэриэһиргиир эбит. Онон кырачаан сүрэҕин киинэҕэ уһуллар баҕа санаа толорбута. Сытыы-хотуу, кэпсэтинньэҥ майгылаах уол бу иннинэ киинэ кастиныгар холонон көрбүтэ эрээри ааспатах.
Онтон былырыын саас Михаил Лукачевскай кастиныгар икки түһүмэҕи ааһан, киинэ оруолугар бигэргэнэн үөрүү, долгуйуу кынатыгар куустарбыт.
Дьиҥэр, бу оруолга арыый улахан саастаах уолу көрдүүллэрин үрдүнэн, Айсар баҕа санаата баһыйан, холонон көрөргө дьулуһан, оруолга сөптөөҕүн көрдөрөн киинэҕэ уһуллар дьолломмута. Былырыын сайын, устар бөлөҕү кытта Чурапчы улууһугар киинэҕэ уһуллубута, билигин киинэтэ тахсарын долгуйа кэтэһэр.
Итини таһынан бу киинэҕэ Роман Дмитриев оруолун Байаҕантай нэһилиэгин олохтооҕо Семен Лукин толордо. Онон Саха сирин спордун историятыгар сүҥкэн миэстэни ылар чулуу дьоммут туһунан киинэҕэ улууспут аата ааттанарыыттан киэн туттабыт.
Мария Аргунова