Соторутааҕыта Томтор нэһилиэгэр үөрүүлээх быһыыга-майгыга Өймөкөөн улууһугар төгүрүк сылы быһа кэлэр-барар ыалдьыттары көрсөргө, олохтоох дьону маанылаах сандалыга ыҥырарга туһуламмыт саха балаҕана аһылынна.
Бу тутууну улууска ыытыллыбыт Олоҥхо Ыһыаҕын чэрчитинэн өссө сайын саҕалаабыттара түмүктэнэн, дьоро киэһэҕэ нэһилиэк олохтоохторо тоҕуоруһа муһуннулар.
Саха балаҕана олохтоох дьаһалта баһылыга Алексей Винокуров көҕүлээһининэн тутулунна. Аһыллыы сиэригэр-туомугар кини солбуйааччыта Айаал Неустроев кытынна.
Тэрээһин култуурунай бырагырааматын Томтордооҕу Култуура дьиэтин үлэһиттэрэ (дириэктэр Татьяна Бурцева) тэрийдилэр.
Култуура киинин уус-уран салайааччыта Евдокия Готовцева салайар “Куйаар дьүрүскэнэ” фольклорнай бөлөҕө буруо таһааран, арчылаан, кэлбит дьону-сэргэни алгыс ырыатынан көрүстэ. Ыалдьыттар ситии быаҕа баҕа санааларын сипсийэн, салама баайдылар, тэрийээччилэр ону балаҕан иһигэр ыйаан, сахалыы сиэри-туому тутустулар.
Балаҕаҥҥа ититии тиһигэ киллэриллэн, кыһыннары үлэлиир гына бэлэмнэннэ. Манна асчытынан сварщик идэлээх Уус-Майаттан төрүттээх күтүөт Денис Захаров үлэлиэҕэ. Кини кэргэнин Людмила төрөппүттэрэ Сергей Степанович уонна Александра Гаврильевна Винокуровтар Томтор олохтоохторо.
Денис балаҕан дьиэтэ үлэҕэ киирэригэр үлэлэспитин таһынан, киин куораттан туох баар тэрили, иһити-хомуоһу бэйэтэ атыылаһан аҕалла диэн олохтоохтор киэн тутта кэпсээтилэр. Денис баһылык солбуйааччыта Айаал Николаевиһы кытта кыһыл лиэнтэни кырыйан ыалдьыттары үөрэ-көтө мааны сандалылаах саха балаҕаныгар ыҥырдылар.
Онон бу саха балаҕаныгар олохтоох, кэлии дьон чэйдии, үссэнэ сылдьыахтара, саха национальнай куукунатын ураты бүлүүдэлэрин, о.д.а. аһы-үөлү амсайыахтара турдаҕа.
Любовь Кривошапкина