Арассыыйаҕа быйыл Дьиэ кэргэн сыла, оттон Саха сиригэр Оҕо сыла биллэриллибитэ. Итиэннэ кут-сүр халандаарынан сахаларга Айыыһыт сыла үүммүтэ. Соторутааҕыта Томтордооҕу култуура дьиэтигэр “Минута славы” диэн аан бастакы дьиэ кэргэн тэрээһинин арыйдылар. Бу дьоро киэһэҕэ нэһилиэк бастыҥ ыаллара түмүстүлэр, – диэн Томтордооҕу култуура дьиэтин уус-уран салайааччыта Евдокия Готовцева биһиэхэ сэһэргээтэ.
Соторутааҕыта Томтордооҕу култуура дьиэтигэр Дьиэ кэргэн сыла олус тэрээһиннээхтик саҕаланна. Бу быһаарыныылар дьиэ кэргэн сыаннастарын харыстыырга, киэҥник тарҕатыыга туһуланаллар, саҥа талааннары арыйыы, дьон айар кыаҕын сайыннарыы, народнай уонна прикладной сатабылларын араас көстүүнэн көрдөрүү, сааһыттан тутулуга суох уһулуччу талааннарын, дьоҕурдарын киэҥ эйгэҕэ көҕүлээһин, көрдөрүү уонна өйөөһүн буолар.
Дьүүллүүр сүбэҕэ бэрэссэдээтэлинэн СӨ култууратын туйгуна Оксана Суздалова, оттон чилиэннэринэн социальнай көмүскэл үлэһитэ Айталина Слепцова, Томтордооҕу оҕо искусствотын оскуолатын уһуйааччыта, Өймөкөөн нэһилиэгин “Тымныы Оройо” култуура дьиэтин дириэктэрэ Ульяна Захарова буоллулар. Дьоро киэһэни иилээн-саҕалаан Н.М. Заболоцкай-Чысхаан аатынан кыраайы үөрэтэр түмэл дириэктэрэ Айталина Иванова ыытта.
2-с миэстэ, Өймөкөөнтөн Гермогеновтар дьиэ кэргэнэ
Үөрүүлээх тэрээһин кыттааччылара: Өймөкөөн нэһилиэгиттэн Гермогеновтар (кыыстара — Күннэй, ийэлэрэ Аксинья, аҕалара Ньургун) уонна Аммосовтар (оҕолоро: Уйгулаана, Дьулуур, Эрчим, ийэлэрэ Маргарита, аҕалара Спартак). Томтортон эдэр ыал Светлана Ядреева, Александр Петров, Горелыхтар дьиэ кэргэн (оҕолоро Мишель, Александра, Кристина, ийэлэрэ Валентина, аҕалара Максим), Егоровтар (оҕолоро Киара, ийэлэрэ Нина, аҕалара Сергей). Бу бары даҕаны олус талааннаах ыаллар уонна тэрээһиҥҥэ олус түмсүүлээхтэрэ көрөөччү биһирэбилин ыллылар. Ол курдук саамай артистичнай уонна талааннаах аатыран, 1 миэстэни уонна кыайыылаах аатын Аммосовтар ыллылар. Оттон 2-с миэстэни Гермогеновтар, 3 м-с миэстэ Егоровтар буоллулар. Кыттааччылары барыларын кубогынан уонна сыаналаах бириистэринэн, сэртипикээттэринэн наҕараадалаатылар. Уопсай бириис үбэ 50 тыһ.солк.
Кыайыылаах аатын Өймөкөөн нэһилиэгиттэн Аммосовтар дьиэ кэргэнэ ыллылар
Махталбытын биллэрэбит күүс-көмө буолбут дьоммутугар уонна кыттааччыларга.
Өймөкөөн сирин эдэр ыалларыгар баҕарыахпыт этэ өрүүтүн маннык куонкурустарга уонна тэрээһиннэргэ көхтөөхтүк кэлэн кыттаргытыгар. Чөл куттаах, чэгиэн өйдөөх- санаалаах, инникигэ эрэллээх саҥа үүммүт сылга үктэниэҕиҥ!
— Дьиэ кэргэҥҥитигэр мэлдьи таптал, өйдөһүү, өйөһүү төрдө баар буолуохтун, – диэн Томтордооҕу култуура дьиэтин уус-уран салайааччыта Евдокия Готовцева кэпсээнин түмүктээтэ.
Сиһилии «Хотугу сардаҥа» хаһыакка ааҕыҥ
Евдокия Егорова суруйда