Томтор нэһилиэгин олохтоохторо “Олорор дьиэ уонна куорат эйгэтэ” национальнай бырайыак иитинэн бөһүөлэк тас көстүүтүн тупсарыыга тус кыттыыны ылар кыахтаахтар.
Ол курдук “Куорат тупсаҕай эйгэтин олохтооһун” бырайыак чэрчитинэн олохтоохтор тэйиччиттэн куоластааһынын ньыматынан нэһилиэккэ пааркалары, искибиэрдэри, бульвардары тутууга тус санааларын этиэхтэрин сөп.
Бу иннинэ бырагыраама чэрчитинэн Томторго Медиктэр уул., 1, Советскай уул., 9 уонна Куйдуһуҥҥа 9 №-дээх дьиэлэр тастарын тупсарыы бырайыага оҥоһуллубута.
Дойду бэрэсидьиэнэ Владимир Путин Федеральнай Мунньахха туһаайыытыгар бүтүн Арассыыйатааҕы “Куорат тупсаҕай эйгэтин олохтооһун” бырайыактар куонкурустарын уонна РФ култуурунай эбийиэктэрин харыстааһын уһун кэмнээх бырагырааматын 2030 сылга диэри уһатарын туһунан иһитиннэрбитэ.
Быйыл “2-с Бороҕон нэһилиэгэ” МТ 2025 с. тутуллуохтаах икки эбийиэккэ куоластааһыны биллэрэр:
— Обручев уулуссатыгар бульвар;
— Култуура уонна сынньалаҥ паарката.
Эбийиэктэри талыыга куоластааһын дойду үрдүнэн 2024 сыл кулун тутар 15 күнүгэр саҕаланар. Онно 14-н үөһээ саастаах хас биирдии гражданин биир эбийиэккэ куолаһын биэриэн сөп диэн 2-с Бороҕон нэһилиэгин баһылыгын солбуйааччыта Айаал Неустроев олохтоохторго быһаарда.
Эбийиэктэри 2024 с. кулун тутар 15 күнүттэн муус устар 30 күнүгэр диэри https://14.gorodsreda.ru. бүтүн Арассыыйатааҕы онлайн-платформаҕа киирэн талыахха сөп.
Любовь Кривошапкина