Томтордор сырдык пасханы үөрэ-көтө көрүстүлэр

Томтор нэһилиэгин Култуура дьиэтин үлэһиттэрэ соторутааҕыта сырдык пасханан быыстапка-дьаарбаҥка тэрийдилэр.

Бу күн ким баҕалаах чочуобунаҕа кэлэн пасха сымыыттарын, куличтары сибэтии гыннылар. Нэһилиэк олохтооҕо Ньургуйаана Белолюбская бэйэтэ алмаас быысапкатынан хомуйан оҥорбут хас даҕаны таҥара мөссүөнүн (икона) олохтоохтор сэргии көрдүлэр-иһиттилэр, — диэн сэһэргээтэ кулууп уус-уран салайааччыта Евдокия Готовцева.

Саха киһитэ үрдүк айыыларга итэҕэлэ күүстээх. Билиҥҥи балаһыанньаны учуоттаан саха дьоно барыта этэҥҥэ эрэ буоллун диэн, ыаллыы иллээхтик олорор атын омук дьонун итэҕэлин эмиэ дириҥник убаастыыр үгэстээх. Ис сүрэҕиттэн үрдүк айыылартан сырдыгы, сылааһы, доруобуйаны аргыый аҕайдык көрдөһөн, дууһатын уоскутунар…

Любовь КРИВОШАПКИНА,

Хаартыскалары Е. Готовцева тиксэрдэ.