Өрөспүүбүлүкэтээҕи олохтоох көҕүлээһиннэри өйүүр бырагыраама (ППМИ) муниципальнай тэриллиилэргэ суолталаах боппуруостарын быһаарарга төһүү өйөбүлүнэн буолбута хас даҕаны сыл буолла.
Ол курдук, бу бырагырааманан Томтор нэһилиэгэр учуонай, геолог С.В. Обручев искибиэрэ аһыллыбыта, Оҕо спортивнай оскуолатын аттыгар спортивнай былаһаакка тутуллубута, бөҕү-сыыһы тиэйэр массыына атыыласпыттара.
Быйылгы дьылга олохтоох көҕүлээһини өйүүр бырагыраама чэрчитинэн Томтор нэһилиэгин олохтоохторо сайыҥҥы кэмҥэ ууну ыытар турбаны оҥорорго санааларын эттилэр.
Нэһилиэк дьоно сайын аайы оҕуруоттарыгар уонна дьиэ иһинээҕи-таһынааҕы үлэтигэр туттар ууга олус наадыйаллар. Сайынын уу барар турбатын олохтооһун Буор-Үрэххэ насостуур ыстаансыйаны тутууттан саҕаланыахтаах. Ол быһыытынан бу ыстаансыйаттан ититии тиһиктэригэр турбалары тардан быһа холбуохтара.
Ити курдук бу бырагыраама муниципальнай тэриллиилэргэ суолталаах боппуруостары быһаарарга кыах биэрэр.
Любовь Кривошапкина