Томтордооҕу музыкальнай оскуола 1973 сыллаахха балаҕан ыйын 1 күнүгэр оччотооҕу 2-с Бороҕон Сэбиэтин бэрэссэдээтэлин Власий Петрович Кривошапкин көҕүлээhининэн, Өймөкөөн оройуонун култуура салаатын бирикээhигэр олоҕуран төрүттэммитэ.
Оскуола маҥнайгы дириэктэринэн уонна аккордеон кылааhын преподавателинэн Наталья Николаевна Домра үлэлээбитэ. Кини Владивостокка педагогическай училище музыкальнай салаатын бүтэрэн, «Ырыа учуутала» идэлээх ыраах Өймөкөөҥҥө үлэлии кэлбитэ.
Томторго музыкальнай оскуола саҥа дьиэтэ 1976 сыллаахха тутуллан үлэҕэ киирбитэ. Власий Петрович музыкальнай инструменнары, нотнай литератураны соҕурууттан сакаастаан аҕалтарбыт, тэрилтэни миэбэлинэн хааччыйбыт үтүөлээх.
Ол кэмтэн ыла оскуолабытыгар анал үөрэхтээх музыканнар кэлэн, тыа сирин оҕолорун муусука кэрэ эйгэтигэр уhуйан барбыттара.
1975-1983 сс. музыкальнай оскуола дириэктэринэн Житомир куораттан кэлбит талааннаах музыкант, баянист Владимир Анатольевич Слесарев үлэлээбитэ. Ити сылларга Томторго вокальнай-инструментальнай ансаамбыл уонна духовой инструменнар оркестрдара тэриллэн, оҕолор уонна учууталлар нэһилиэккэ ыытыллар култуурунай тэрээһиннэр актыыбынай кыттыылаахтара буолан барбыттара.
1981-1987 сс. Өймөкөөн нэhилиэгэр Томтордооҕу музыкальнай оскуола филиала начальнай оскуолаҕа аһыллан үлэлээбитэ. 1990-с сылларга музыкальнай оскуола филиала Үчүгэй нэhилиэгэр аһыллыбыта.
Үчүгэйгэ хореография кылааhа аһыллыбытыгар уһуйааччынан Валентина Ипатьевна Баишева анаммыта. Кини хореограф быһыытынан «Биракчан» хотугулуу фольклорнай үҥкүү ансаамбылын тэрийэн олус таһаарыылаахтык үлэлээбитэ. Бу айар кэлэктиип араас таһымнаах куонкурустарга, бэстибээллэргэ ситиһиилээхтик кыттан, элбэх наҕаарадалардаах буола үүммүтэ.
Валентина Ипатьевна кэлиҥҥи сылларга Томторго көһөн, «Һэйм» үҥкүү ансаамбылын тэрийбитэ. Бу бөлөх эмиэ улууска эрэ буолбакка, киэҥ сиринэн биллэр-көстөр кэлэктиип буолбута. В.И. Баишева 2011 сыллаахха Францияҕа Парижка 18 оҕону илдьэ баран, «Рождество в Париже» куонкуруска кытыннарбыта. Кинилэр онно 1-кы истиэпэннээх лауреат үрдүк аатын ылан аар-саарга аатырбыттара.
Ирина Семеновна Прудецкая оскуолабытын 15 сыл устата сатабыллаахтык салайан үлэлэппитэ. Кини үлэлиир кэмигэр оскуолабыт материальнай-техническэй базата лаппа тупсубута. Ирина Семеновна сыл аайы оскуола дьиэтигэр өрөмүөн ыыттарара. Саҥа миэбэлинэн, сахалыы национальнай инструменнарынан хааччыллыыга бары күүһүн-уоҕун уурбута. Оннооҕор хотугулуу үҥкүү соннорун Дьокуускайга иис фабрикатыгар тиктэрбитэ, оскуоланы саҥа оргтехниканан хааччыйбыта.
Биһиги 2014 сыллаахха музыкальнай оскуола айымньылаахтык үлэлииригэр олук уурбут ытыктыыр киһибит Власий Петрович Кривошапкин аатын үйэтитэр сыаллаах, оскуолабытыгар кини үтүө аатын иҥэрбиппит.
Билигин оскуолабытыгар эдэр, талааннаах уhуйааччылар үлэлииллэр-хамсыыллар, оҕолору ускуустуба кэрэ эйгэтигэр уһуйаллар. Биһиги иитиллээччилэрбит араас куонкурустарга, бэстибээллэргэ кэккэ ситиhиилэрдээхтэр.
Оскуолабыт төрүттэммитэ 50 саастаах үбүлүөйүнэн дойдулаахтарбытыгар, бииргэ алтыhан үлэлээбит кэллиэгэлэрбитигэр, үөрэнээччилэрбитигэр итии-истиҥ эҕэрдэбитин ыытабыт, тапталлаах оскуолабыт сылтан-сыл үүнэ-сайда, тупса турдун диэн алгыыбыт.
Бу туһунан сиһилии “Хотугу сардаҥа” хаһыакка ааҕаарыҥ.
Галина Петрова, Оҕо ускуустубатын оскуолатын дириэктэрэ, Томтор