Ил Дархан Айсен Николаев быһаарыытынан, 2024 сыл өрөспүүбүлүкэҕэ Оҕо саас сылынан биллэриллэн турар. Томтордооҕу «Кэскил» уһуйаан үлэһиттэрэ Оҕо саас сылын аһыллыытын тэрийэн, дьоҥҥо-сэргэҕэ үгүс үөрүүнү бэлэхтээтилэр.
Бырааһынньык күн уһуйаан сэбиэдиссэйэ Валентина Сивцева оҕолорго уонна иитээччилэргэ эҕэрдэ тылын, баҕа санаатын тиэрдиититтэн саҕаланна.
Өр сылларга оҕо иитиитигэр үлэлээбит педагогтар, кэргэннии Евдокия Гаврильевна уонна Александр Васильевич Харитоновтар үтүө алгыс тылынан алҕаан, аал уот иччитин аһатан, саха күндү аһынан — алаадьылаах кымыһынан күндүлээтилэр. Кырачаан оҕолорбут баҕа санааларын толороору сэргэҕэ салама иилэн саха үгэһин өссө чугастык билистилэр.
Салгыы уһуйаан иитиллээччилэрэ оҕо саас кэрэтин туһунан ырыа ыллаан чугдаардылар. Иитээччилэр, иитээччи көмөлөһөөччүлэрэ уонна уһуйаан бары үлэһиттэрэ оҕолорго анаан тыйаатыр аанын сэгэтэн, нуучча норуотун «Дьиэ дьиэчээн» (Теремок) диэн остуоруйаны оонньоон көрдөрөн, оҕолор интэриэстэрин тартылар.
Бу күн «Сайдам» социальнай тэрилтэ үлэһиттэрэ Мария Винокурова, Анатолий Мергенев цирк эйгэтиттэн быһа тардан көрдөрдүлэр. Клоун күллэрдэ, араас оонньуулары оонньотто, фокус алыбар киллэрэн оҕолор олус астыннылар. Кинилэр клоуннары кытта үҥкүүлээн, күрэхтэһэн, түмүгэр сымнаҕас оонньуур бэлэх тутан, үөрүүлэрэ муҥура суох буолла. Уһуйаан үлэһиттэрэ оҕолорго дьоллоох түгэни бэлэхтээн, төрөппүттэртэн махтал тыллары туттулар.
Бу тэрээһини үбүнэн өйөөбүт Томтор нэһилиэгин аҕа баһылыгар Алексей Винокуровка улахан махталбытын тиэрдэбит. Тэрээһиммитигэр кыттыыны ылбыт Евдокия, Александр Харитоновтарга, Мария Винокуроваҕа уонна Анатолий Мергеневка эмиэ улаханнык махтанабыт.
Маннык куруутун оҕолорбут тустарыгар кыһамньыбытын уура, кэрэни үксэтэ туруоҕуҥ.
Галина Васильева, «Кэскил» уһуйаан иитээччитэ, Томтор