Томтор учуутала — өрөспүүбүлүкэҕэ бастыҥ учуутал аатын ылла

Соторутааҕыта С.К. Макаров аатынан Чурапчытааҕы гимназияҕа «Бастыҥ история уонна обществознание учуутала» диэн VI-с өрөспүүбүлүкэтээҕи куонкурус ыытылынна. Онно биир дойдулаахпыт, Томтор орто оскуолатын учуутала,  Ярослав Винокуров кыайыы-хотуу үөрүүтүн биллэ. 

Бу куонкурус сэрии бэтэрээнэ, РСФСР уонна Саха АССР үтүөлээх учуутала, бойуон-учуутал, саха Маресьева, Чурапчы оройуонун 1-кы бочуоттаах олохтооҕо Степан Кузьмич Макаров кэриэһигэр уонна Кыайыы 80 сылын чэрчитинэн ыытылынна.

Бу үрдүк таһымнаах куонкуруска 14 эр бэрдэ учууталлар өрүспүүбүлүкэ араас муннуктарыттан кытыннылар.

Мин маннык куонкурус ыытылларын эрдэ истэр этим. Онон быйыл сыал-сорук туруорунан, кыттарга санаммытым. Билиҥҥи кэмҥэ оскуола эйгэтигэр эр киһи ахсааннаах буолла. Ол иһин бу куонкурус эр дьону үөрэх кыһатыгар үлэлии кэлэллэрин пропагандалыыр соруктаах ыытылынна.

Олус үрдүк таһымнаах тэрээһин ааста. Ыраах хоту сытар Өймөкөөн улууһа бастакытын маннык куонкуруска кытыыны ылла диэн тэрийээччилэр бэлиэтээн эттилэр.

Куонкурус 4 түһүмэҕинэн барда. 1-кы түһүмэххэ мин 11-с кылаас үөрэнээччилэригэр экэниэмикэҕэ сибээстээх аһаҕас уруогу ыыттым. Иккискэ — история уонна обществознание уруогар туһанар ньымаларбын маастар-кылаас көмөтүнэн көрдөрдүм. Үөрэнээччилэр олус диэн сэҥээрдилэр. Ону тэҥэ «Мин – учууталбын» диэн талааны көрдөрүүгэ уонна кылаас чааһын ыытыыга, патриотическай быһыы тиэмэтин арыйдым.

Миигин кытта биир идэлээхтэрим: Төрүттэн — Айталина Атласова, Өймөкөөнтөн — Айыына Яковлева көмөлөстүлэр. Кинилэр күүс-көмө, тирэх буолбуттарыгар махталым муҥура суох, — диэн Ярослав Карлович санаатын эттэ.

Евдокия ЕГОРОВА

Читайте дальше