Томтор нэһилиэгин олохтооҕо, СР доруобуйа харыстабылын туйгуна Вера Александровна КОЛОСОВА Өймөкөөн тыатын сиригэр дьоллоох олоҕу түстээн, дьахтар-аймах, саҥа төрөөбүт оҕо доруобуйата чөл буоларын туһугар өр сыллар усталарыгар эҥкилэ суох үлэлиир.
Вера Александровна үйэ аҥарын кэм устата (49 сыл, 5 ый) доруобуйа харыстабылын эйгэтигэр үлэлээн кэллэ. Кини акушерскай дьыалаҕа үрдүк квалификационнай категориялаах исписэлиис, идэтин дэгиттэрдик баһыылаабыт киһи.
Сүрүн үлэтин таһынан бириэмэ булан, нэһилиэккэ ыытыллар тэрээһиннэргэ актыыбынайдык кыттар. Кэргэнинээн Александр Алексеевичтыын 4 оҕоҕо күн сырдыгын бэлэхтээн, атахтарыгар туруорбуттара. Билигин оҕолоро бары үлэһит дьон. Салалтата бэлиэтииринэн, үлэлиир сылларын тухары В.А. Колосова улуус, республика демографическай уонна экономическай сайдыытыгар улахан кылаатын киллэрбит бэтэрээн-медик буолар. Вера Александровна үөрэҕин таһымын өрүү үрдэтинэр, аныгы кэми кытта тэҥҥэ хардыылаан иһэр.
В.А. Колосова туһунан биир идэлээхтэрэ санааларын маннык үллэһиннилэр.
Т.И. Готовцева, участковай сиэстэрэ:
— Вера Колосованы кытта мин 1982 сылтан ыла Томтор участковай балыыһатыгар бииргэ үлэлээбитим. Бастаан үөрэҕин бүтэрэн баран, күн сиригэр кэлэргэ көмөлөһөн төрөппүт оҕолоро билигин номнуо 46 саастаахтар. Кини дууһатын барытын ууран туран үлэлиир. Мин санаабар, кини талан ылбыт идэтигэр айылҕаттан айдарыллыбыт талааннаах медик.
В.А. Колосова өйүнэн-санаатынан олох кырдьыбат, оптимист, наһаа актыыбынай, кэлэктиип тутаах
А.П. Гермогенова, Томтордооҕу участковай балыыһа сиэстэрэтэ:
— Мин Томтордооҕу участковай балыыһаҕа 1995 сыллаахха үлэлии кэлбитим, ол кэмҥэ В.А. Колосова ыстаарсай медсестранан уонна акушерканан үлэлиирэ. Вера Александровна эдэр үлэһиттэри үөрэтэн, баай уопутун, үлэ үөрүйэхтэрин кэллиэгэлэрин кытта үллэстэр дьиҥнээх профессионал.
Вера Александровна тыа сирин общественнай олоҕор көхтөөх кыттыыны ыларын биир дойдулаахтара үчүгэйдик билэллэр. Кинини кытта 29 сыл устата бииргэ үлэлээбит буоламмын, Вера Александровна биһиги кэлэктииппит, сэлиэнньэбит биир саамай ытыктанар киһитэ буолар диэн чопчу этэр кыахтаахпын.
Бу туһунан сиһилии «Хотугу сардаҥа» хаһыакка ааҕаарыҥ
Мария ГЕРМОГЕНОВА