Улуус баһылыгын э.т. Иван Максимов бу күннэргэ нэһилиэнньэлээх пууннарга барыларыгар сылдьан, улууска ааспыт сылга туох үлэ-хамнас барбытын биир сомоҕо биригээдэтин кытта отчуоттаата.
Томторго Иван Максимов улуус бүддьүөтүн ымпыгар-чымпыгар тиийэ быһааран, салгыы хайдах хайысхалаахтык үлэ барыаҕын туһунан сиһилии кэпсээтэ диэн сырдатар отчуоттуур мунньахха сылдьыбыт биһиги общ.корр. Дария Тихомирова:
— Мунньахха сүрдээх аһаҕас кэпсэтии таҕыста, дьон санаатын ирэ-хоро этинэн, үс чаастан ордук бириэмэ биллибэккэ да ааста. Быыстала суох элбэх ыйытыктар бэриллэн, тус харда киирэн истэ.
Отчуоттуур мунньах диэн бука бары сыралаһан туран оҥорбут үлэбитин, сыллааҕы ситиһиибитин, итэҕэһи-быһаҕаһы бэлиэтээһиҥҥэ, салгыы сайдыыны түстээһиҥҥэ, биирдэ кэлбит олоххо кэрэтик, тупсаҕайдык, дьоллоохтук олорорго туһаайыллар буоллаҕа.
Билиҥҥи, хас биирдии киһи уйулҕатын долгутар, анал байыаннай дьайыыга буола турар балаһыанньаны Иван Егорович бэйэтэ илэ хараҕынан көрөн кэлбит буолан, олус дириҥник сырдатта. Оҕолор барахсаттар этэҥҥэ эргиллэн кэллиннэр!
Н.М. Заболоцкай-Чысхаан аатынан Томтор орто оскуолатын дириэктэрэ Алена Егорова тэрилтэҕэ чиҥ туруктаах гараас суох буолан, массыыналар таһырдьанан туралларын тоһоҕолоон бэлиэтээтэ.
Өрөспүүбүлүкэҕэ быраастар мобильнай биригээдэнэн сылдьан үлэлииллэрин, миэстэтигэр тустаах көмөнү, харахха эппирээссийэни да оҥороллорун, сайаапка быһыытынан айанныылларын биһиги ыраахтан олорон ордугургуу көрөбүт. Маныаха сыһыаннаах боппуруос киирбитигэр улууска уопуттаах офтальмолог быраас баарын туһунан эттилэр. Нэһилиэнньэни былааннаахтык көрүүгэ-истиигэ сайаапка түһэриллиэ диэн боротокуолга киллэрдилэр.
Куйдуһун муостатын бүтүннүү көтүрэн баран олунньуга саҕалаан, муус устарга тутуута бүтүөхтээх диэн иһитиннэрии тиэрдилиннэ.
Тыа хаһаайыстыбатын бородууксуйатын оҥорон таһаарааччылар истиилэригэр көмө от тиэйиллэ турар, бырабыыталыстыба өттүттэн тустаах көмө-өйөбүл баар диэн быһаардылар.
Тыа сирэ оҥорон таһаарар бородууксуйата — иитэн таһаарар сүөһүтэ, сылгыта, табата буоллаҕа. Далга ынах дэлэйэ, сыһыыга сылгы көччүйүүтэ, чыыстайга таба сырсара — бу барыта сайдыы көрдөрүүтэ.
— Саалаҕа тобус-толору киһи мустан, тыа киһитин сиэринэн быһаарыылаахтык, төрүт тылбытын өрө тутан, сахалыы сэлэстибит. Хайдах эрэ кэҥээн, холкутуйан, улууспут баһылыгын эбээһинэһин толоро сылдьар И.Е. Максимовка, кини сомоҕо биригээдэтигэр махталбытын ытыс тыаһынан тиэртибит. Сытыы боппуруостары тылбытынан этиннибит уонна инникитин ситииһиилэри баҕардыбыт, — диэн кэпсээтэ Дария Алексеевна.
Бу туһунан сиһилии “Хотугу сардаҥа” хаһыакка ааҕыҥ.
Любовь Кривошапкина