Төрүт орто оскуолатын улахан кылаас оҕолорун «АЙТЭС» бэйэни салайыныы түмсүүлэрэ саҥа үөрэх дьылын аһымал аахсыйаларынан саҕалаатылар.
Биһиги, улахан кылаас үөрэнээччилэрэ тыыл бэтэрээнигэр Мария Гаврильевна Кондаковаҕа оттук маһын саһааннаан биэрбиппит. Бары болдьообут бириэмэбитигэр сып-сап мустан, үлэбит кээмэйин билсэн баран, уолаттар мас хайыттылар, кыргыттар саһааннаатыбыт. Элбэх уонна түмсүүлээх буолан, үлэбитин бэрт түргэнник түмүктээбиппит.
Соторутааҕыта аны сэрии сылын оҕотугар Анна Кононовна Слепцоваҕа кыстык маһын бэлэмнииргэ ылсыбыппыт. Манна биһигини Дмитрий Николаевич Давыдов салайбыта, үлэбитин хонтуруоллаабыта.
«АЙТЭС» оскуола самоуправлениета бэтэрээн-учууталбыт Егор Егорович Находкин дьиэтигэр тиийэн Аҕа саастаах дьон күнүнэн эҕэрдэлээтибит. Ытык учууталбытыгар сэмэй бэлэхпитин туттаран, дууһатын сылаанньытар ис сүрэхтэн тахсар тыллары анаатыбыт.
Биһиги ытык кырдьаҕастарбытынан киэн туттабыт, убаастыыбыт уонна сыанаалыыбыт. Чэгиэн буолуҥ!
Кристина Березкина, 11-с кылаас, оскуола бэрэсидьиэнэ, Төрүт