Соторутааҕыта Төрүт орто оскуолата (дириэктэр Г.А. Павлуцкай) биатлоҥҥа успуорт маастара, Өймөкөөн улууһун бочуоттаах олохтооҕо Д.Д. Прокопьев кэриэһигэр үгэскэ кубулуйбут улуустааҕы хайыһар уонна сахалыы атах оонньууларыгар күрэхтэһиини көҕүлээн ыытта.
Хаһан буоларын курдук, күрэхтэһии сиэрэ-туома сиэрдээхтик тутуһулунна (тэрийээччи Анна Павлуцкая). Оскуола аатыттан Мария Николаева оҕо успуордун өйөөн бириис туруорбут спонсордарга — Төрүт нэһилиэгин аҕа баһылыгар Владимир Алексеевка, Томтор орто оскуолатын дириэктэригэр Алёна Егороваҕа махталын тириэртэ. Мария Кимовна оскуола оҕолоро успуорка ситиһиилэрэ дьоһуннааҕын тоһоҕолоон бэлиэтээтэ.
Оттон нэһилиэк баһылыга баһылыга Владимир Алексеев Алдаҥҥа буолбут спартакиадаҕа хайыһыр күрэҕэр үөрэнээччилэр Рудольф Беляев, Юлия Макарова, устудьуоннар Вениамин Лысов, Сандал Атласов Өймөкөөн хамаандата бастыырыгар кылааттарын киллэрбиттэрин санатта. Күрэхтэһии кылаабынай судьуйата Павел Атласов атах оонньууларыгар успуорт маастара Темур Чачуа, тустууга успуорт маастара, анал дьайыы кыттыылааҕа Рустам Машарипов Төрүт оскуолатыттан кынаттанан тахсыбыттарын туһунан санаан ылла. Павел Семенович ол кэнниттэн күрэхтэһии сыалын-соругун, быраабылатын быһаарда.
Эбиэккэ дылы атах оонньууларын күрэҕэ түмүктэннэ. Томтор нэһилиэгиттэн кэлэн кыттыбыт 8 спортсмен күрэҕи сытыырхатан биэрдилэр (тириэньэр Ульяна Винокурова).
Түмүккэ атах оонньуутугар Томтор хамаандата бастаата.
Эбиэттээн баран хайыһарга алын кылаастарга физкультура учуутала Елена Слепцова күрэхтэһии саҕаламмытын биллэрдэ. Өр сылларга элбэх күрэхтэһиини тэрийсибит физика, математика учуутала Семен Стручков хамаҕатык түмүгү таһааран истэ. Хайыһар күрэхтэһиитин көрө үгүс киһи муһунна. Оннооҕор хаалыктаах хаамар ытык дьоммут Марфа Николаевна Егорова, Акулина Ариановна Егорова күрэхтэһиини көрө кэлэн көх-нэм буоллулар.
Сыл аайы нэһилиэк дьоно-сэргэтэ, Дьокуускайга олорор, үлэлиир биир дойдулаахтарбыт, биирдиилээн учууталлар оҕо успуордун өрүүтүн өйөөн спонсордыыллара кэрэхсэбиллээх.
«Кэскиллээх хайыһардьыт» кубок Прокопьев Д.Д. сиэнигэр Эрхан Прокопьевка ананна. «Успуорт бэтэрээнэ» кубок хаһаайынынан сүүрүк-марафонец Виталий Атласов ааттанна. «Учуутал-тириэньэр» кубок үрдүк категориялаах физкультура учуутала, СӨ үөрэхтээһин туйгуна Павел Атласов, ону тэҥэ тахсыылаахтык үлэлии сылдьар Томтор оскуолатын учуутал-тириэньэригэр Ульяна Винокуроваҕа ананна.
Эдэр спортсменнарга барыларыгар инникитин даҕаны үрдүктэн үрдүк ситиһиилэри баҕарабыт. Чөл олоҕу тутуһан, үөрэххэ-билиигэ тардыһан, бары тэрээһиннэргэ көхтөөхтүк кыттан дьон бэрдэ буолуҥ.
Сиһилии “Хотугу сардаҥа” хаһыакка ааҕаарыҥ.
Елена Черемкина, биһиги общ. корр., Төрүт