Бу дьыл атырдьах ыйын 9 күнүгэр – Төрүт олохтоох омуктар аан дойдутааҕы бырааһынньыктарыгар – Томтор сэлиэнньэтигэр тас эйгэни кытта ситимнэһэн, аал уоту оттон, айах тутан ыраастаныы сиэрэ-туома ыытылынна, араас омук дьоно бииргэ үөрэ-көтө түмүстүлэр.
Нэһилиэк олоххо көхтөөх, ытыктанар дьоно-сэргэтэ Н.М. Заболоцкай-Чысхаан аатынан кыраайы үөрэтэр түмэл балаҕаныгар муһуннулар.
Бу дьоро күн Өймөкөөн улууһугар түөлбэлээн олорор аҕыйах ахсааннаах омуктар Ассоцияларын бэрэссэдээтэлэ Марианна Тарковаҕа уонна РФ үтүөлээх учуутала, кыраайы үөрэтээччи, төрүт олохтоох омуктар култууралара салгыы сайдыытыгар тус кылаатын киллэрэр Мария Бояроваҕа СӨ төрүт олохтоох аҕыйах ахсааннаах норуоттарын боппуруостарыгар Ил Түмэн бастайааннай кэмитиэтин бэрэссэдээтэлэ Елена Голомарева илии баттааһыннаах Махтал сурук туттарылынна.
Маны тэҥэ “2-с Бороҕон нэһилиэгэ” МТ дьаһалтатын баһылыга Алексей Винокуров ситиһиилээх үлэ дьонун Махтал суруктарынан бэлиэтээтэ.
Ис кут иэйиилээх иистэнньэҥнэр быыстапкалара көрдөрүүгэ турбута, хаһан буоларын курдук, мустубут дьон болҕомтотун тарта. Томтордооҕу бибилэтиэкэ үлэһиттэрэ тэрийбит кинигэлэрин быыстапката биһирэннэ.
Бырааһынньыкка национальнай таҥастарын симэнэн кэлбиттэр илии-илиилэриттэн ылсан «Һээдьэлээн» битийдилэр, толору астаах-үөллээх остуол тула олорон уруккуну-хойуккуну санастылар, истиҥник-иһирэхтик кэпсэттилэр.
Бу туһунан сиһилии “Хотугу сардаҥа” хаһыакка ааҕаарыҥ.
Любовь Кривошапкина