Улууска “Куттала суох уонна хаачыстыбалаах айан суоллара” национальнай бырайыак чэрчитинэн быйыл күһүөрү Төрүт нэһилиэгин хайысхатынан суолга хапытаалынай өрөмүөн ыытыллара былааннанар.
«Төрүт нэһилиэгэ» МТ дьаһалтатын баһылыга Владимир Алексеев иһитиннэрбитинэн, соторутааҕыта кэлэн ааспыт күүстээх ардахтар кэннилэриттэн нэһилиэккэ тиийэр суолу уу «Көһөр үрэх» туһаайыытынан суурайда. Нэһилиэк салалтата ол туһунан тута улуустааҕы дьаһалтаҕа биллэрбитэ.
Бу күннэргэ улуус дьаһалтатыттан хапытаалынай тутууга салаатын начаалынньыга Павел Березкин миэстэтигэр тиийэн, баар балаһыанньаны билистэ. Онон манна турбаны уларытары, биитэр тааһынан кутары аҕыйах кэм иһигэр быһаарыахтаахтар.
Онуоха даҕатан эттэххэ, «Көһөр үрэхтэн» Төрүт бөһүөлэгин туһаайыытынан суолу хапытаалынай өрөмүөннээһиҥҥэ 6 мөл. солк. кэриҥэ үп көрүллүбүтүн туһунан баһылык эттэ. Сотору кэминэн тендер биллэриллэн, үлэ күһүөрү саҕаланара сабаҕаланар. Өрөмүөн үлэтэ Өймөкөөн улууһун бүддьүөтүттэн үбүлэниэҕэ.
— Онуоха диэри суол-иис туругун кэтээн көрүөхпүт, — диир Владимир Петрович. – Өскөтүн күүстээх ардахтар түһэр түгэннэригэр, хаайтарыыны таһаарбат туһутттан тустаах миэрэлэри миэстэтигэр ыларга бэлэммит.
Бу туһунан сиһилии “Хотугу сардаҥа” хаһыакка ааҕыҥ.
Любовь Кривошапкина