Бу дьыл ахсынньы 1 күнүгэр Төрүт орто оскуолатын учууталлара тыл көтөҕөн, РФ Уһуйааччы уонна настаабынньык сылын түмүктүүр тэрээһиннэр чэрчилэринэн нэһилиэккэ үөрэх тэрилтэлэрин улуустааҕы спартакиадата тэрилиннэ. Маннык таһымнаах күрэхтэһии улууска аан бастакытын ыытылынна.
Учууталлар спартакиадаларын Томтор орто оскуолатын дириэктэрэ Алена Егорова уонна Үчүгэй орто оскуолатын дириэктэрэ Валентина Карпова өйөөтүлэр. Кинилэр быһаччы өйөбүллэринэн тэрээһин үрдүк таһымнаахтык ыытылынна.
Күрэхтэһии 8 көрүҥүнэн барда: волейбол, стритбол, армрестлинг, гиирэни анньыы, буулдьанан ытыы, дуобат, өбүгэ оонньуулара: хаамыска уонна хабылык, канат тардыһыыта.
Төрүт орто оскуолатын дириэктэрэ Гаврил Павлуцкай улуустааҕы спартакиаданы үөрүүлээх быһыыга-майгыга арыйарыгар биир идэлээхтэригэр өрүүтүн даҕаны маннык маассабай успуорду өрө туталларыгар, чөл олоҕу тутуһалларыгар баҕа санаатын тиэртэ. Күрэхтэһии кылаабынай судьуйата Павел Атласов кэлбит оскуолаларга махталын биллэрэн туран, “Ким кыахтаах, күүстээх кыайыыны ситистин!”, — диэн этиитинэн түмүктээтэ.
Тэрээһин аһыллыытыгар «Эльгинка» үҥкүү бөлөҕө уонна Томтортон ыалдьыппыт Дмитрий Винокуров ыллаан-туойан мустубут дьону олус диэн сэргэхситтилэр.
Күрэхтэһиигэ биирдиилээн көрүҥнэргэ хамаандалар ситиһиилэрэ маннык: дуобакка эр дьоҥҥо 1-кы миэстэ – Климентий Филиппов (Үчүгэй), 2-с Павел Харитонов (Томтор), 3-с миэстэ – Ньургун Атласов. Дьахталларга – 1-кы миэстэ Вера Полятинская (Төрүт), 2-с Алевтина Дмитриева (Үчүгэй), 3-с миэстэ – Элеонора Аммосова (Томтор).
Хаамыскаҕа 1-кы миэстэни Александр Слепцов (Үчүгэй), 2-с миэстэни Семен Стручков (Төрүт), 3-с миэстэни Пелагея Обутова (Томтор) ыллылар. Хабылыккка кыайыылааҕынан Николай Исаков (Үчүгэй), 2-с миэстэҕэ Христина Петрова (Төрүт), үһүскэ Элеонора Аммосова таҕыстылар.
Арм-рестлиҥҥэ эр дьоҥҥо 1-кы миэстэни Евгений Сивцев (Төрүт), 2-һи Климентий Филиппов (Үчүгэй), 3-с миэстэни Михаил Вензель (Томтор) ыллылар, дьахталларга саамай күүстээҕинэн бу көрүҥҥэ өрөспүүбүлүкэ икки төгүллээх чөмпүйүөнэ, маастарга кандидат Елена Слепцова (Төрүт) ааттанна. 2-с миэстэҕэ Татьяна Егорова (Үчүгэй), үһүскэ Санаайа Ефимова (Томтор) таҕыстылар.
24 киилэ гиирэни анньыыга Ньургун Атласов (Төрүт) үчүгэй көрдөрүүнү ситистэ. Оттон иккискэ Михаил Вензель (Томтор), үһүскэ Климентий Филиппов (Үчүгэй) таҕыстылар. Бэргэнник ытыыга эр дьоҥҥо Александр Атласов (Төрүт) бастаата, Михаил Вензель (Томтор) иккис, Климентий Филиппов (Үчүгэй) үһүс буоллулар. Дьахталларга Надежда Беляева (Төрүт) бастаата, 2-с миэстэ – Татьяна Егорова (Үчүгэй), 3-с – Санаайа Ефимова (Томтор) буолары ситистилэр.
Саамай тыҥааһыннах көрүҥнэринэн волейбол, стритбол уонна канат тардыһыыта буолла.
Волейболга Үчүгэй хамаандата бэлэмнээҕин уонна күүстээҕин көрдөрөн, кыайыы өрөгөйүн биллэ. Паастаһыы, ылыы-быһыы кинилэргэ барыта табылынна.
Төрүт хамаандата оонньуу тиэхиньикэтигэр кыахтаах эрээри, эрдэ сылайан хаалла. Маныаха учууталлар үлэттэн ордон соччо бэлэмнэммэтэхтэрэ таайда. Томтор эдэр хамаандата оонньуу аайы тэбиэһирэн истэ.
Стритболга (баскетбол көрүҥэ) Томтор хамаандата быраабыланан оонньоон кыайда. Иккис –Төрүт, үһүс – Үчүгэй хамаандалара буоллулар.
Саамай ыһыылаах-хаһыылаах көрүҥүнэн канат тардыһыыта буолла. Тас көрүҥүнэн да күүстээх Үчүгэй оскуолатын хамаандата барыларын соһон кэбистэ. Төрүт хамаандата сатабылын туһанан, Томтору кыайда. Хас биирдии кыттааччы санаалара бөҕөх, бэйэлэрин нэһилиэктэрин чиэһин көмүскүү сылдьаллара хайҕаллаах.
Түмүккэ 8 көрүҥ кэнниттэн бааллары түмэн Үчүгэй хамаандата кыайыылааҕынан таҕыста. Хаһаайыннар кинилэртэн биир баалынан хаалан, 2 миэстэ буоллулар. Үһүс бириистээх миэстэҕэ Томтор хамаандата тигистэ.
Спартакиада сыалын-соругун ситтэ диэххэ сөп. Оскуола оҕолоро күрэҕи көрөн эмиэ инникитин чөл олоҕу тутуһан, учууталларын курдук актыыбынай позициялаах буолуохтара турдаҕа.
Учууталлар улуустааҕы спартакиадаларын тэрийэргэ Төрүт оскуолатын профкомун салайааччыта, черчение уонна технология уһуйааччыта Дмитрий Давыдов сүүрдэ-көттө. Маны тэҥэ оскуола хаһаайыстыбаннай боппуруостарга сэбиэдиссэйэ Надежда Сергеева эмиэ таһаарыылаахтык үлэлэстэ. Оттон тэрээһин тас көстүүтүн киэргэтии боппуруоһун Надежда Босикова быһаарда. Учууталлар үгүстэрэ буфетка, секретариатка о.д.а. тэрээһин үлэҕэ күүс-көмө буоллулар.
Успуорт аҕыс көрүҥэр спартакиаданы ымпыгар-чымпыгар тиийэ физкультура учуутала, СӨ үөрэҕириитин туйгуна Павел Атласов тэрийдэ. Ону тэҥэ оскуола дириэктэрэ, күрэххэ быһаччы кыттыбыт Гаврил Павлуцкай, педагог Елена Слепцова, күрэхтэри тэрийиигэ уопуттаах бэтэрээн-учуутал, СӨ үөрэҕин туйгуна Семен Стручков күүс-көмө буоллулар. Семен Семеновиһы күрэхтэһии күн 63 сааһын томточчу туолбутунан эҕэрдэлээтибит.
Ону таһынан спартакиаданы өйөөбүт улуустааҕы үөрэх кыһаларын биир идэлээхтэрин сойууһун бэрэссэдээтэлигэр Т.И. Николаева, спонсордаабыт учууталларга уонна «Чэчир» оҕо уһуйаанын үлэһиттэригэр махталбыт муҥура суох.
Елена Черемкина, биһиги общ.корр, Төрүт