Быйыл, 2024 сылга Саха сиринээҕи көмүс хостуур бырамыысаланнас 100 сыллаах үбүлүөйүн бэлиэтиир.
Үлэһит династиялар
“Тарын” көмүс хостуур тэрилтэ (АО «ТЗРК) Өймөкөөн улууһугар 2017 сылтан үлэлиир. Тэрилтэ сүрүн эбийиэгэ – Өймөкөөн оройуонун Дражнай көмүс хостуур сирэ.
GV Gold бөдөҥ хампаанньа иһинэн үлэлиир “Высочайшай” ПАО 4000-тан тахса киһини үлэлэтэр. Онон Саха сиринээҕи көмүс хостуур бырамыысаланнас 100 сыллаах үбүлүөйүнэн уонна Арассыыйаҕа Дьиэ кэргэн сылынан сибээстээн, бу салааҕа үлэлии сылдьар дьиэ кэргэттэр династияларын билиһиннэрэбит.
Өймөкөөн оройуонун “Тарын” көмүс хостуур тэрилтэҕэ уон дьиэ кэргэн династията баар. Алдан оройуонугар — тоҕус ыал. Бу дьиэ кэргэннэр бары көлүөнэ көлүөнэни солбуйуутун үгэһин тутуһаллар. Сотору кэминэн үлэһит династиялар өссө элбиэхтэрэ. Ол курдук, балаҕан ыйыгар корпоративнай үөрэхтээһин бырагырааматыгар кыттар үлэһиттэр оҕолоро – саҥа устудьуоннар хайа байытар комплекс идэлээх үлэһиттэрин бэлэмниир үөрэх кыһатыгар үөрэниэхтэрэ.
Идэлэрин дэгиттэр баһылаабыттар
Пивчулиннар дьиэ кэргэттэрэ – Тарыннааҕы хайа-байытар кэмбинээт бастыҥ үлэһиттэрэ. Владимир Викторович уонна кини уолаттара Максимнаах Алексей ыарахан уйуктаах хайа боруода тааһын хостуур тиэхиньикэни дэгиттэр баһылаабыт дьон.
— Аҕам уонна быраатым “Тарын” көмүс хостуур тэрилтэҕэ 2016 с. үлэлии кэлбиттэрэ, мин — иккис сылым. Ыал буолан, Калининградка олохсуйбутум. Аҕам уонна быраатым Дьокуускайга олороллор. Онон баахтаҕа үлэлиирим төрүөтэ – чугас дьоммун кытта бииргэ сылдьаары. Биһиги аҕабытын кытта үһүөн бииргэ үлэлиибит. Бэл, симиэнэбит кыраапыга сөп түбэһэр. Дьиэ кэргэн династиятын быһыытынан, Металлург күнэ биһиэхэ дьиэтээҕи бырааһынньыкпытынан буолар, — диэн Алексей Пивчулин бэйэтин санаатын үллэһиннэ.
Светлана Гриненко кэргэнин Валерийы кытта 2015 сылтан бииргэ үлэлиир.
— Кэргэним бульдозерга үлэлиир, мин үлэһиттэргэ спецтаҥастарын тигэбин. Аҕыйах кэмҥэ үлэлиэм дии санаабытым баара, номнуо 10 сыл буола охсубут! Аны кыыспыт Ульяна манна үлэҕэ киирэн, 2021 сылтан штукатур-малярынан үлэлиир. Онон дьиэ кэргэнинэн бииргэ үлэлиир буолан, чугас дьоҥҥун күн аайы көрө-истэ сылдьаҕын.
Ити курдук, “Тарын” көмүс хостуур тэрилтэҕэ үлэлиир дьиэ кэргэн династиялара үлэлэригэр бэриниилээх дьон.
Бу туһунант сиһилии “Хотугу сардаҥа” хаһыакка ааҕыҥ.
Елена Потоцкая
Хаартыскалары Светлана Костина тиксэрдэ