Томтордооҕу В.П. Кривошапкин аатынан оҕо Ускуустубатын оскуолатыгар уус-уран ойуулуур-дьүhүннүүр кылаас үлэлиир. Үөрэнээччилэри үрдүк категориялаах преподаватель Нина Егорова 2012 сылтан айымньылаахтык салайан үөрэтэр.
Нина Егоровна Намнааҕы И.Е. Винокуров аатынан педагогическай коллеһы 2007 сыллаахха ситиhиилээхтик бүтэрэн, уруhуй уонна черчение учууталын идэтин баһылаабыта. 2010 сыллаахха Саха судаарыстыбаннай педагогическай академиятыгар кэтэхтэн туйгуннук үөрэнэн, «Уруhуй учуутала» диплому ылбыта.
Уус-уран салаа үөрэнээччилэрэ улууска, өрөспүүбүлүкэҕэ ыытыллар дьоҕуру сайыннарар араас куонкурустарга, быыстапкаларга, олимпиадаларга ситиhиилээхтик кытталлар.
2020 с. «Чысхаан уонна аан дойду үрдүнэн айылҕа туругун уларыйыыта» (Ирбэт тоҥ ууллуута) диэн Өймөкөөн оҕолорун уруhуйдарыгар олоҕуран сахалыы тылынан уруhуйдуур кинигэ Варшаватааҕы университетка бэчээттэммитэ.
Кинигэ ааптара уонна эрэдээктэрэ Күннэй Такасаева. Кини Саха Сириттэн сылдьар антрополог, Варшаватааҕы университет Артес Либералес факультетын Польша-Сибиир билим бөлөҕүн сүрүннээччи.
Бу кинигэҕэ Томтордооҕу Ускуустуба оскуолатын уус-уран кылааһын үөрэнээччилэрин Лия Винокурова, Мария Гермогенова, Света Суздалова, Марина Винокурова, Анна Корякина, Виталий Сивцев, Наташа Шкулева уруhуйдара киирбиттэрэ.
Нина Егорова 2022-2023 үөрэх сылыгар тыа куустатын нэhилиэктэригэр каникул аайы тиийэн, баҕалаахтары түмэн, пластиктан куукула оҥорорго маастар-кылаастары ыыппыта, манна элбэх киһи астына-дуоһуйа, умсугуйан туран үөрэммитэ.
Нина Егорова кыhамньылаах, эппиэтинэстээх уонна үрдүк ирдэбиллээх учуутал. 2023 с. кини СӨ култууратын туйгуна бочуоттаах бэлиэни ылбыта.
Бу туһунан “Хотугу сардаҥа” хаһыакка сиһилии ааҕаарыҥ.
Галина Петрова, оҕо Ускуустубатын оскуолатын дириэктэрэ, Томтор