Бу күннэргэ Өймөкөөн улууһугар электрическэй ситимнэри кыстыкка бэлэмниир үлэ бара турар.
«Сахаэнерго» АУо пресс-сулууспата иһитиннэрбитинэн, Өймөкөөн улууһунаҕы РЭС кэлэктиибэ саҥа эбийиэктэри технологическай ситимнииргэ болҕомтотун ордук уурар.
Онон Өймөкөөн улууһун Сордоҥноох уонна Томтор нэһилиэктэрин олохтоохторун олорор дьиэлэрэ уонна социальнай эбийиэктэрэ киин ситимҥэ холбоноллор.
Ону тэҥэ Биэрэк-Үрдэ учаастагар энергетиктэр саҥа модульнай хочуолунайы тутан үлэҕэ киллэриэхтэрэ.
“Биһиги уустук килиимэттээх, усулуобуйалаах сиргэ олорор буолан, хас биирдиибит бэйэ-бэйэбитигэр көмөлөһөргө, өйөһөргө дьулуһабыт. Биһиги тэрилтэбитигэр уопсайа 116 киһи үлэлиир. Бары үлэлэригэр бэриниилээх уонна эппиэтинэстээх туру үлэһит дьон. Бэйэлэрин идэлэрин дэгиттэр баһылаабыт исписэлиистэр.
Нэһилиэнньэни үрдүк хаачыстыбалаах электрическэй уотунан уонна сылааһынан хааччыйарга сыл ахсын тиэхиньикэни өрөмүөннүүр, көрөр-истэр үлэни ыытабыт, саҥа эбийиэктэри уот ситимнэригэр холбуубут», — диэн бэлиэтиир Өймөкөөн улууһунааҕы РЭС салайааччыта Андрей Заболоцкай.
«Теплоэнергосервис» АУо үлэһиттэрэ бүгүҥҥү күҥҥэ Уус-Ньараҕа үс уу сылытар хочуолу саҥардыыга, Томторго хочуолунай кыамтатын саҥардыыга үлэлэһэллэр. Онон кыстыкка үлэ 60% бэлэм.
Өймөкөөн улууһун пресс-сулууспата