Бу күннэргэ Өймөкөөн улууһугар 2024-2026 сыллар бүддьүөттэрин аттарыы ыытыллар.
Улуустааҕы экэниэмикэ уонна борогунуостааһын управлениетын салайааччыта Саргылана Алексеева бэлиэтээбитинэн, улуус дьаһалтатын иһинэн 19 муниципальнай бырагыраама үлэлиир. Ааспыт нэдиэлэҕэ тустаах исписэлиистэр бу бырагыраамалары үөрэттилэр, ырыттылар. Биллэн турар, сүрүн болҕомто социальнай хайысхалаах бырагыраамаларга ууруллар. Ол курдук, эдэр ыалы дьиэнэн хааччыйыы, үөрэх уонна култуура тиһиктэрин сайдыыта, оҕо уонна дьиэ кэргэн боппуруостара үбүлээһини эрэйэллэр. Маны таһынан, тыа хаһаайыстыбатын, туризм салаатын, тутуу, муниципальнай суолу оҥоруу, ыччат бэлиитикэтэ эмиэ болҕомтону эрэйэр боппуруостар.
— Тыа хаһаайыстыбатын салаатыгар сайдыы боппуруоһугар туһааннаах бырагыраама чэрчитинэн көлө атыылаһыыта, мелиорация, оттуур тэрили атыылаһыы о.д.а боппуруостар быһаарыыга киирбиттэрэ. Тыа хаһаайыстыбатын миниистирэ Артем Александровы кытта улуус баһылыгын э.т. Иван Максимов көрсүһүүлэрин түмүгэр муниципальнай бырагырааманы олоххо киллэриигэ судаарыстыба бүддьүөтүттэн субсидия көрүллүүтүн боппуруоһа быһаарылынна.
— Тутуу салаатыгар Өймөкөөҥҥө 4 кыбартыыралаах саҥа дьиэ тутуллар. Үчүгэйгэ орто оскуола салгыы тутуллуоҕа. Томторго Оҕо былаһаакката уонна Өймөкөөҥҥө Култуура уонна сынньалаҥ пааркатын тутуу норуот көҕүлээһининэн (ППМИ) тутуллара былааннанар, — диэн бэлиэтээтэ улуустааҕы экэниэмикэ уонна борогунуостааһын управлениетын салайааччыта Саргылана Алексеева.
Өймөкөөн улууһун пресс-сулууспата