Сүрэҕин сылааһын кырдьаҕас уонна кыһалҕалаах дьоҥҥо анаан

Кырдьаҕас, ыалдьар уонна кыһалҕалаах дьоҥҥо көмөлөһүүгэ, кинилэри көрүүгэ-харайыыга идэлээх көмө хайаан да наада. Санааны эрчимирдэр, күннээҕи олоҕу тупсарар туһугар күнтэн күн социальнай үлэһиттэр тулалыыр эйгэбит чөл буолуутугар үлэлэһэллэр. Чэпчэкитэ суох үлэлээх, сүрэҕин сылааһын аҕам саастаах дьоҥҥо, кыамматтарга аныыр, киниэлэргэ көмөлөһөр аналлаах Төрүт нэһилиэгин социальнай үлэһитин Ольга Пестереваны кытта соторутааҕыта кэпсэттибит.

О.Н. Пестерева Өймөкөөн улууһун Төрүт нэһилиэгиттэн төрүттээх, дойдутугар олорор. Кини социальнай эйгэҕэ 2016 сылтан саҕалаан үлэлиир. Билигин Ольга уопутуран, билиилээх-көрүүлээх, кырдьаҕастарга амарах сыһыаннаах үлэһит быһыытынан дьоҥҥо-сэргэҕэ биллэр. Кыһалҕаҕа кыһарыйтарбыттары дьиэлэригэр тиийэн көрөр-истэр буолан, түбүктээх үлэ үгэнигэр сылдьар.

Кини билинэринэн, ханнык баҕар үлэ үтүө да, мөкү да өрүттэрдээх. Тыа сирэ олох усулуобуйатынан хайдах да барыта хааччыллыллах куораты кытта тэҥнэспэт. Ол курдук, тыа сирин социальнай үлэһитэ көрөр-истэр дьонугар тиийэн кемелеьер, иһит, муоста, таҥас сууйар. Саас-сайын аайы тэлгэһэни хомуйуу кытта соцүлэһиккэ сүктэриллэр. Дьон көрдөстөҕүнэ астарын да астаан биэриэн  сөп, аны бородуукталарын атыылаһан аҕалар.

— Мин Төрүт нэһилиэгэр социальнай үлэһит соҕотохпун, — диир Ольга Николаевна. — Улэм уустук өрүтэ диэн кырдьаҕас дьон араас олохтоох, майгылаах буолаллар. Сороҕор туох да сылтаҕа суох кыыһыран-тымтан да туруохтарын сөп. Оннук түгэҥҥэ кырдьаҕас дьону өйдөөн, кинилэргэ истиҥник сыһыаннаһан, санааларын көтөҕөргө кыһаллабын. Ол кинилэргэ бэйэтэ эмп, улахан туһалаах буолар. Оттон үлэм үчүгэй өрүтэ диэн, куруук солото суох сылдьан, бириэмэм ааспытын билбэккэ да хаалабын.

Үлэ тыыл бэтэрээнэ Мария Гаврильевна Кондаковалыын (Кыайыы күнүгэр)

Тыыл-үлэ бэтэрээнэ, Христина Кононовна Каландарова 

Кырдьаҕас дьоҥҥо сонун-нуомас кэпсиир, наадаларыгар көмөлөһөн илии-атах буолар киһи олус наада уонна аҕам саастаах, ыарыһах дьоҥҥо кыра да болҕомто ууруллара  тоҕоостоох.

Нэһилиэккэ мин тоҕус кырдьаҕас, кыаммат дьону көрөбүн-истэбин. Бары араас саастаахтар, сүрүннээн 60-тан үөһээ. Үлэм чааһа сарсыарда 9-тан саҕаланар, нуормаламмат (ненормированный) диэн аатырар.

Быйыл тыыл бэтэрээннэригэр уонна СВО кыттыылаахтарын дьиэ кэргэттэригэр  нэһилиэк дьаһалтата буор-босхо оттор мас түһэттэрбитэ. Биһиги соторутааҕыта оҕолорбун кытта кыамматтарга мас саһааннаан кэлбиппит.

— Мин социальнай үлэһит идэтин талбыппыттан олох кэмсиммэппин, — диир Ольга Пестерева.

Бу туһунан сиһилии «Хотугу сардаҥа» хаһыакка ааҕыҥ

Евдокия ЕГОРОВА

 

Читайте дальше