Ийэ тыл күнэ биһиги өрөспүүбүлүкэбитигэр СӨ бастакы бэрэсидьиэнэ Михаил Николаев ыйааҕынан 1996 сылтан бэлиэтэнэр. Бу даата мээнэ талыллыбатаҕа.
Олунньу 13 күнүгэр биллиилээх тыл үөрэхтээҕэ, саха тылын маҥнайгы алпаабытын оҥорбут Семен Новгородов төрөөбүт күнэ. Төрөөбүт тыл-хайа баҕарар норуот үйэттэн үйэҕэ, көлүөнэттэн көлүөнэҕэ бэриллэр күндү баайа. Сахалыы сайаҕастык саҥарар, иэйиибитин истиҥник этинэр Ийэ тылбыт үйэлэргэ сүппэккэ үүнэ-сайда турдун!
Н.О. Кривошапкин аатынан Өймөкөөн орто оскуолатыгар “Тыл — омук тыына” диэн саха тылын нэдиэлэтэ кылаас чаастарыттан саҕаламмыта. Ону сэргэ “Айабыт-тутабыт” диэн оҕолор үлэлэрин быыстапката олус көхтөөхтүк ааспыта (сал. М.М. Готовцева, В.В. Лукина).
“Хомоҕой хоһоон хонуутугар» дорҕоонноохтук ааҕыы күрэҕэ ыытыллыбыта (сал. А.Г. Винокурова, А.С. Готовцева). Кылаастарынан ыытыллыбыт “Саха омук олоҕуттан” диэн тиэмэҕэ ”Таайбараҥ оонньуута” олус табыллыбыта.
Үһүс күммүтүгэр “Саха кыыһын уобараһа” диэн үөрэҕи технология кэбиниэтигэр Мария Иванова салайан ыыппыта. Көрүдүөргэ хомустар, туостан, мастан, фарфортан оҥоһуллубут сахалыы иһиттэр бэркэ таҥыллан туруоруллубуттара.
Төрдүс күммүтүгэр хабылык, хаамыска күрэхтэрэ ыытыллыбыта (сал. Л.П. Аммосова, Н.В. Старков, физрук Р.А. Иванов). Хабылыкка орто бөлөххө Алексей Княжев (7-с кылаас) бастакы үрдэлгэ, Ярик Атласов (7-с кылаас) иккис үрдэлгэ, онтон үһүскэ 5-с кылаас үөрэнээччитэ Айылгылаана Слепцова тиксэн үөрбүттэрэ-көппүттэрэ.
Улахан бөлөххө бастакы үрдэли Петр Борисов (11-с кылаас), иккиһи Кристина Шпнева (9-с кылаас), онтон үһүс үрдэли Күннэй Оконешникова (9-с кылаас) ылбыттара.
Бэһис күҥҥэ “Чуопчаар чыыбы-чаабы чабырҕах” диэн (сал. С.У. Сивцева) чабырҕахсыттар күрэхтэригэр алын сүһүөх кылаастарга бастакы үрдэлгэ Янита Старкова тахсыбыттара. Иккис үрдэл — Уйгулаана Винокурова, үһүс үрдэл — Аммосова Милена буолбуттара.
Улахаттарга “ Квиз-оонньуу” күрэҕэ бэрт сытыытык буолан ааспыта.
Алтыс түмүктүүр күммүтүгэр мини кукольнай тыйаатырга “Биэс ынахтаах Бэйбэрикээн эмээхсин”, “Таал-таал эмээхсин”, “Олоҥхо дойдута” диэн көрдөрүү үгүс оҕо болҕомтотун тардыбыта (сал. М.С. Иванова).
Салгыы “Сахалыы сон арааһын” быыстапката буолбута. Панно, кыбытык тигии, сахалыы таҥастар быыстапкалара нэдиэлэбитин ситэрэн-хоторон биэрбитэ (сал. М.С. Иванова).
Найаана Корякина, 7-с кылаас, Өймөкөөн