Сырдык, сылаас тыыннаах Сордоҥноох нэһилиэгин Далбар хотуна

Бу күннэргэ Сордоҥноох нэһилиэгин элбэх оҕолоох дьиэ кэргэнин маанылаах ийэтэ, эбэтэ, далбар хотун Анна Павлова өрөгөйдөөх үбүлүөйүн бэлиэтиир. Анна Иосифовна төрөөбүт нэһилиэгин кэлэр кэскилин түстэһэр бастыҥ дьонтон биирдэстэрэ буолар.

Анна төрөппүттэрэ Иосиф Михайлович уонна Тамара Егоровна Болотуровтар дьоллоох Дьокуускай куоракка устудьуоннуу сылдьан харахтарынан хайҕаһан, сүрэхтэринэн сөбүлэһэн ыал буолбуттара. Күҥҥэ көрбүт соҕотох кыысчааннара кинилэр үөрэхтэрин бүтэрэн, диплом ылар эппиэттээх кэмнэригэр күн сирин көрбүтэ.

Анна ийэтин курдук иитээччи идэтин баһылаабыта. Кини Бүлүүтээҕи педучилищеҕа үөрэнэн иитээччи буолуоҕуттан өр сылларга Сордоҥноох, Томтор нэһилиэгин уһуйааннарыгар идэтинэн таһаарыылаахтык үлэлээбитэ. Анна 1995 с. сүрэҕин аҥаарын Иваны көрсөн ыал буолбута. Павловтар түөрт туруйа уолга, биир кыталык кыыска күн сирин бэлэхтээбиттэрэ.

Кини туһунан Матрена Аммосова санаатын маннык үллэһиннэ:

Анна Иосифовна 2012 с. “Сордоҥноох нэһилиэгэ” МТ дьаһалтатын баһылыгын солбуйааччытынан үлэлии киирбитэ. Кини оччотооҕу баһылык Иван Максимовы кытта 10 сыл устата бииргэ алтыһан нэһилиэги салайбыттара. Саҥа талыллыбыт баһылык Альберт Вензели кытта эмиэ биир тылы булан, таһаарыылаахтык үлэлээбиттэрэ.

Анна Иосифовна 12 сыл устата  олохтоох дьаһалтаҕа үлэлиир кэмигэр Сордоҥноох нэһилиэгэр элбэх социальнай-экэнэмиичэскэй хайысхалаах бырайыак олоххо киирдэ. Онуоха барытыгар кини киллэрбит кылаата сүҥкэн. Анна Иосифовна дьоҥҥо сыһыана истиҥ буолан, олохтоохтор кинини дириҥник убаастыыллар. Бииргэ үлэлиир дьоно эмиэ кинини ытыктыыбыт уонна холобур оҥостобут.

Кэргэннии Павловтар үтүө суобастаах үлэһит буолалларын таһынан, нэһилиэккэ ыытыллар туох баар тэрээһиннэргэ көхтөөхтүк кытталлар. Соторутааҕыга диэри ынах сүөһү тутан, тыа ыалын сиэринэн оҕолорун үлэ үөрүйэхтэригэр иитэн улаатыннарбыттара. Билигин сылгыларыгар оттууллар, уолаттар сылгы баазатын тутан дьэндэтэн, дьонноругар улахан күүс-көмө буолаллар. Бары дьиэ кэргэнинэн үлэни-хамнаһы өрө туталлар, сайыҥҥы кэмҥэ сайылыктарыгар тахсалларын, бииргэ сынньаналларын, айылҕаҕа сылдьалларын олус сөбүлүүллэр.

Бу туһунан сиһилии “Хотугу сардаҥа” хаһыакка ааҕыҥ.

Любовь Кривошапкина

 

Читайте дальше