Соторутааҕыта нэһилиэккэ анал байыаннай дьайыы кэккэтигэр сылдьар биир дойдулаахтарбытыгар, биһиги саллааттарбытыгар көмө буолар аналлаах «Сылаас иэйиибитин тиэрдэн…» диэн аахсыйа ыытылынна.
Үчүгэй орто оскуолатын кэлэктиибин, үөрэнээччилэрин көмөлөрүнэн чахчы да чаҕылхай аһымал аахсыйа буолан ааста.
Бу күн ыалдьыттарга анаан дэлэй астаах дьаарбаҥка үлэлээтэ. Айылҕабыт күндү бэлэхтэрэ, төрөппүттэрбит, оҕолорбут, үлэһиттэрбит астаабыт минньигэс бүлүүдэлэрэ олохтоохтору үөртэ.
Аахсыйа иккис чааһыгар хабыр хапсыһыылаах, аралдьытар аукцион дьону-сэргэни сэҥээртэ. Ауциоҥҥа Баай Байанай бэлэхтэрэ, кыһыҥҥы идэһэ мааны аһа-үөлэ оонньоннулар.
Бу киэһэ сценаны киэргэттилэр оҕолорбут истиҥ ырыалара, уһулуччу үҥкүүлэрэ, көрдөөх-нардаах сценкалара. Сценаҕа бастаан тахсыбыт Муода тыйаатырын оҥоһуктара көрөөччүлэргэ биһирэннилэр. Кэнсиэр кэмигэр дьону-сэргэни олус умсугутар лотерея оонньонно. Хас биирдии көрөөччү киирии билиэтинэн оонньоммут бириистэри долгуйа күүттүлэр.
Аахсыйа түмүгүнэн уопсайа 40 тыһ. солк. киирдэ.
Инникитин даҕаны бииргэ тутуспутунан, ханнык да түгэннэргэ өйөһө, ситэрсэ сылдьыахпыт диэн эрэллээхпит.
Махталбытын тиэрдэбит амарах сүрэхтээх үлэһиттэрбитигэр, оҕолорбутугар. төрөппүттэрбитигэр, биир дойдулаахтарбытыгар. Кэнэҕэскитин өссө маннык өрүү түмсүүлээх буолуоҕун!
Аграфена Аммосова, биһиги общ.корр., Үчүгэй