Суруналыыс Сергей Егоров саҥа кинигэтэ күн сирин көрдө

«Закаленные холодом Оймяконья (Өймөкөөн дьыбарыгар хатарыллан)» диэн ааттаах  биллиилээх биир дойдулаахпыт, кыраайы үөрэтээччи Сергей Егоров кинигэтэ соторутааҕыта таҕыста.

— Кинигэ — улуус иннигэр үтүөлээх дьоннор тустарынан. Республикаҕа, улууска биллэр суруналыыс, краевед С.М. Егоров улуус хаһыаттарыгар тахсыбыт ыстатыйаларын түмэн уонна бу иннинэ таһааттарбыт дьоҕус кинигэлэриттэн холбоон, 152 страницалаах сборник буолан күн сырдыгын көрдө, — диир суруналыыс огдообото Светлана Егорова. – Кинигэҕэ икки кэм ыпсыытыгар Өймөкөөн улууһун устуоруйатыттан, баай-меценат Н.О. Кривошапкин олоҕуттан, дойдубутугар гражданскай сэрии сылларыттан, улуус исполкомун бастакы бэрэссэдээтэлин М.Н. Винокуров-Индигирскэй олоҕуттан, репрессия ыар сылларын таарыйар, биһиги оройуоммутугар олохсуйа хаалбыт араас омук дьонун дьылҕаларын туһунан уонна Өймөкөөммүт сайдыытыгар суолу хаалларбыт биир дойдулаахтарбыт, итини тэҥэ үлэттэн дьолу булбут, интэриэһинэй дьон тустарынан уустаан-ураннаан кэпсэнэр, — диэтэ Светлана Ильинична.

Эбэн эттэххэ, историческай суруйуулары сэргэ сборникка Сергей Егоров лирическэй айымньылара эмиэ киллэриллибиттэр. Хоһооннорго, кэпсээннэргэ, новеллаларга ааптар санаатыгар саспыт, сүрэҕэр сөҥмүт таптал, сүгүрүйүү, барҕа махтал тыллара кэрэһит буолан киирбиттэрэ кинигэни иһирэх тыынныыр.

Кинигэ тираһа хааччахтааҕынан, Саха сирин Киин Национальнай бибилэтиэкэтигэр уонна улуус бибилэтиэкэлэригэр билсиэххэ сөп.

Редакция