Бу дьыл олунньу 7 күнүгэр улуус баһылыгын э.т. Иван Максимов уонна тэрилтэлэр салайааччылара, дьаһалта эппиэттээх үлэһиттэрэ ааспыт сыллааҕы үлэ-хамнас туһунан отчуоту Сордоҥноох нэһилиэгин олохтоохторугар иһитиннэрдилэр.
Мунньахха уопсайа 41 киһи сылдьан араас боппуруоһу биэрэн, санааларын үллэһиннилэр. Отчуот сүнньүнэн араас, этиилэр киирдилэр, тустаах хоруйдар киирдилэр.
Сордоҥноох олохтоохторо кэлиҥҥи сылларга толору хааччыллыылаах дьиэлэнэллэрэ олус кэрэхсэбиллээх дьыала. Ол курдук бөһүөлэккэ уонча ыал оннук дьиэлэннэ. Онон кинилэр ассенизационнай массыынаҕа наадыйалларын туһунан боппуруос көтөҕүлүннэ.
Хаһан буоларын курдук, тыа хаһаайыстыбатын сайыннарыы боппуруоһа биир сүрүн миэстэни ылла. Маныаха өртөөһүнү тэрээһиннээхтик ыытыы боппуруоһа бу да сырыыга инники күөҥҥэ турда. Ону сэргэ сири тупсарыы, нүөлсүтүү үлэтэ олус улахан суолталааҕын учуоттаан туран, бу эйгэҕэ идэтийбит, үрдүк квалификациялаах исписэлиис наадатын эттилэр. Сайын аайы ханаабанан ууну ыытыы нэһилиэнньэҕэ кыһалҕалары үөскэтэр. Тыа хаһаайыстыбатын түргэнник сайдар салааларын көрүҥүттэн биирдэстэринэн көтөрү, сибиинньэни иитии буоларынан, олохтоох дьон кууруссаны, сибиинньэни иитиэхтэрин баҕаралларын туһунан эттилэр. Онуоха улуустааҕы Тыа хаһаайыстыбатын управлениетын салайааччыта Руслан Атласов эрдэттэн сайаапка түһэрэр наадалааҕын санатта.
Доруобуйа харыстабылыгар сыһыаннаах боппуруос эмиэ үгүс. Ол курдук, сордоҥноохтор Томторго бастайааннай төрүөккэ үлэлиир тиис бырааһа наадатын туруорсаллар. Бу исписэлиис чугастааҕы нэһилиэктэргэ сылдьан дьону-сэргэни былааннаахтык эмтиирин ситистэллэр диэн баҕа санаалаахтар. Уопсайынан, кырыы сытар нэһилиэк дьоно улуус киинин быраастара нэһилиэнньэлээх пууннары барыларын хабар медицинскэй десаны тэрийиилэрэ үгэскэ кубулуйарын күүтэллэр.
Аны туран сордоҥноохтор урукку балыыһа дьиэтэ эргэрбитинэн, аныгы кэмҥэ эппиэттиир саҥа амбулаторияны тутууну туруорсаллар, саҥа суһал көмө массыыната наадатын ыйаллар.
Ону таһынан Өймөкөөн куустатын нэһилиэктэрин олохтоохторо улуус киинигэр медицинскэй көрүүгэ күнүнэн сылдьалларыгар тустаах көлө анаатахтарына, үгүс киһи кыһалҕата быһаарыллыа этэ диэн санааларын тиэртилэр.
Олохтоохтор айан суолугар өрөмүөн үлэтин ыытыыны таһынан, суолу бүөлүү үүнэн турар тииттэри, талахтары ыраастааһын эмиэ олус наадалааҕын ыйаллар, бу мэһэйтэн сылтаан саахал да тахсар кутталлаах диэн бэлиэтииллэр.
Маны сэргэ “Успуорт – олох нуормата” диэн девиһинэн салайтаран, успуорду өрө тутааччылар саҥа спортивнай саала тутулларын туруорсаллар, уопуттаах тириэньэрдэр наадаларын ыйаллар.
Отчуокка көтөҕүллүбүт сүрүн боппуруостар “Өймөкөөн улууһа (оройуона)” МТ дьаһалтатын баһылыгын э.т. И.А. Максимов 2023 с. үлэ отчуотун түмүк боротокуолугар киирдилэр.
Бу туһунан сиһилии “Хотугу сардаҥа” хаһыакка ааҕыҥ.
Евдокия Егорова