Сордоҥноох кулуубун дьиэтэ бу күһүҥҥүттэн саҥа салайааччылаах үлэтин саҕалаата. Инна Алексеева салалтатынан саҥа айар-тутар сезон арыллыыта үрдүк таһымнаахтык ааста.
Инна Егоровна Өймөкөөн нэһилиэгиттэн төрүттээх, М. К. Аммосов аатынан Хотугулуу-Илиҥҥи федеральнай университет культурология салаатын выпускнига.
Соторутааҕыта култуура киинигэр Саха сиригэр үлэ сылын чэрчитинэн өр сылларга бэриниилээхтик үлэлээбит Сордоҥноох нэһилиэгин туруу үлэһит дьонун чиэстээтилэр. Сордоҥноох аҕа баһылыга Альберт Вензель дьонун истиҥник эҕэрдэлээтэ, сэмэй бэлэхтэри туттарда.
Ону таһынан бу күн Өрөспүүбүлүкэҕэ бэлиэтэнэр Ийэ күнүгэр анаан «Шляпный мастер» диэн күрэх ыытылынна. Бу күрэххэ 5 актыыбынай ийэ кытынна. Хас биирдии ийэ бу күрэххэ анаан-минээн бэлэмнэммитэ көһүннэ, дьэрэкээн, кыраһыабай сэлээппэ арааһа кулууп саалатын киэргэттэ. Дьүүллүүр сүбэ быһаарыытынан 1-кы миэстэни элбэх оҕолоох ийэ, норуот маастара, нэһилиэк биир тутаах киһитэ Екатерина Таркова ылла, 2 миэстэни иитээччи Елена Борисова уонна 3-с миэстэни библиотекарь Мария Никифорова ыллылар. Тэрээһин түмүгэр бары кыттааччылары кулууп дьиэтин кэлэктиибэ минньигэс тордунан күндүлээтэ.
Хас биирдии нэһилиэк олоҕо сайдарыгар, инники кэскилэ кэрэни кэрэхсииригэр, үтүөнү үксэтэригэр, талааннар арыллалларыгар кулууп дьиэтин оруола улахан. Саҥа салайаччылаах Сордоҥноох кулуубун дьиэтигэр үрдүк ситиһиини, интэриэһинэй барыйыактары, элбэх кыттааччыны уонна саҥа нүөмэрдэри баҕарабыт.
Бу туһунан сиһилии “Хотугу сардаҥа” хаһыакка ааҕаарыҥ.
Ольга Скрыбыкина