Сордоҥноох нэһилиэгиттэн төрүттээх, билигин дьиэ кэргэнинээн Уус-Ньара бөһүөлэгин «Нерскэй» микрорайуонугар (Агробаза) олорор Павел Семенович Винокуров 2022 сыллаахха Социальнай көмүскэл уонна үлэ управлениетын нөҥүө социальнай хантараах түһэрсэн, тус хаһаайыстыбатыгар көмө үп ылбыт. Ол харчытын бу ыал хайдах дьаһаммытын туһунан соторутааҕыта улуус нууччалыы тыллаах хаһыатыгар кэпсээбитэ.
Чааһынай хаһаайыстыбаларыгар Винокуровтар-Кривошапкиннар сибиинньэни, кууруссаны уонна перепеллары туталлар. Хантараах көмө харчытын сүрүннээн сылгы иитиитигэр хамсатарга былааннаан, кинилэр урбаанньыт Прокопий Кондаковтан хас да сылгыны атыылаһан, Сордоҥноохтон Агробазаҕа тиэйэн аҕалбыттар.
Билигин сүрүннээн сылгы иитиитин хайысхатыгар үлэлииргэ болҕомтолорун уураллар. Кэлиҥҥи кэмҥэ тус үптэригэр эбии хас да биир саастыылаах кулунчугу атыыласпыттар. Инники өттүгэр иитимньилэрин ахсаанын элбэтэн, сылгы үөрүн үөскэтэр быланнаахтар. Аҕалара Павел Семенович көмүс хостуур артыалга үлэлии сылдьар, итинэн дьиэ кэргэн дохуотугар эбии харчы киллэрсэр.
— Биһиги тус хаһаайыстыбабытын тутарбытыгар дьиэ кэргэнинэн бары кыралыын-улаханныын турунабыт. Кэргэмминээн Евгенийдыын биэс оҕолоохпут. Кинилэри кыра эрдэхтэриттэн тыа хаһаайыстыбатын үлэтигэр сыстаҕас буолалларыгар үөрэтэбит-такайабыт, — диэн кэпсиир Павел Винокуров уонна Марина Соколова улахан кыыстара Марина Кривошапкина. — Үлэ элбэх буоллаҕа: күрүө-хаһаа тутуута, оту бэлэмнээһин о.д.а. Сылгы иитиитин боппуруостарыгар биһиэхэ урбаанньыт Прокопий Кондаков аҕата, Уус-Ньара олохтооҕо Виталий Юрьевич улахан көмө-өйөбүл буолар, сүбэлиир-амалыыр. Инники өттүгэр тыа хаһаайыстыбатын тиэхиньикэтин, тракторы эҥин атыыласпыт киһи диэн баҕа санаалаахпыт. Ол үлэҕэ-хамнаска олус туһалаах буолуо этэ.
Санатар буоллахха, социальнай хантараахха олоҕуран оҥоһуллар көмө тиийиммэт дохуоттаах дьиэ кэргэн ыарахан балаһыанньаттан тахсарыгар көмө буолар сыаллаах. Өрөспүүбүлүкэҕэ көдьүүстээх көмө бу көрүҥэ уонтан тахса сыл үлэлиир, ол кэмтэн өйөбүл кээмэйэ улаатан, бэрт элбэх араҥаҕа тэнийдэ. Хантараах көмөтүнэн тус хаһаайыстыбаны тупсарыахха сөп.
Бырагыраамманы олоххо киллэриигэ федеральнай бүддьүөттэн эбии үбүлээһини учуоттаан 607,1 мөлүйүөн солкуобай көрүллүөҕэ. Биэс тыһыынча кэриҥэ социальнай контракт түһэрсиитэ былааннанар, диэн үлэлээх буолуу министерствотын иһитиннэриитигэр этиллэр.
Өрөспүүбүлүкэҕэ 354 дьиэ кэргэни кытта үлэ булалларыгар хантараах баттаныахтаах, урбаан үлэтин-хамнаһын олоххо киллэриигэ 1 050, кэтэх хаһаайыстыбаны сайыннарыыга 601, олох охсууларыттан, ыарахан балаһыанньаттан тахсарга 2 919.
«Үлэ көрдөөһүнэ» хайысханан идэ ылар эбэтэр эбии идэ ылар үөрэхтэргэ үөрэнии эмиэ көрүллэр. Саха сиригэр баар үлэ биэрээччигэ стажировканы ааһыахха сөп. Социальнай хантараах сүрүн түмүгүнэн дьону үлэ миэстэтинэн хааччыйыы буолар.
Биһи корр.
Ирина Петрова