Уус-Ньараҕа олорор, биир биллэр, уопуттаах тортофея (торду астааччы), 4 оҕо күн күбэй ийэтэ, улахан дьиэ кэргэн туллар тутааҕа, саха мааны Далбар хотуна – Надежда Абрамова. Кини минньигэс тортарын, капкейкаларын, пиццаларын амсайа илик киһи улуус киинигэр суоҕун кэриэтэ диэххэ сөп.
Надежда Ньурба куоратыттан төрүттээх, кини Өймөкөөн оройуонугар 2013 сыллаахтан олохсуйбута.
— Киһи бэйэтин сөбүлүүр дьарыгын таба тайаныыта оҕо сааһын кытта ыкса сибээстээх эбит дии саныыбын. Дьонум кэпсииллэринэн, 9 ыйдаахпар остуолга олорон ас арааһын дэлби буккуйа оонньуур үһүбүн. Ону аҕам көрөн: “Мин оҕом асчыт буолуо” диэн алҕаабытынан, билигин кини эппитин толоро сылдьарбыттан киэн туттабын, — диэн кэпсиир Надежда. — Астыырга миигин күн күбэй ийэм үөрэппитэ, ас астыыр кистэлэҥнэрин арыйбыта. Ийэбинээн өрөбүл ахсын араас минньигэһи астаан, дьоммутун үөрдэр этибит. Бастакы бисквит тордун 10 саастаахпар ийэм төрөөбүт күнүгэр астаан үөрдүбүтүм.
Өссө оҕо сылдьан дьонум үлэлэриттэн эбиэккэ кэлэллэригэр остуолбун кыраһыабайдык киэргэтэн көрсөр этим, кинилэр астыммыт харахтарын көрөн өссө дуоһуйарым, саҥа идиэйэлэр киирэллэрэ. Ол кэмтэн ыла сандалыны сиэдэрэйдик киэргэтэрбин олус сөбүлүүбүн.
Screenshot
Биллэн турар, миэхэ улахан өйөбүлүм дьиэ кэргэним буолар. Кэргэним Михаил тутаах киһим. Бастакы сыаналааччым кини буолар. Оҕолорум — тутаах көмөлөөһүччүлэрим. Чугас дьонуҥ эйиэхэ көстүбэт кынаттарыҥ кэриэтэ буолаллар. Уонна биир саамай өйдүүр-өйүүр дьонум — мин клиеннэрим, — диэн билинэр Надежда Абрамова.
Бу туһунан сиһилии “Хотугу сардаҥа” хаһыакка ааҕаарыҥ.
Ольга Скрыбыкина