Бу күннэргэ Өймөкөөн улууһун Бочуоттаах гражданина Сергей Егоров 70 сыллаах үбүлүөйүнэн сибээстээн, эдэр кэрэспэдьиэннэр икки ардыларыгар биллэриллибит айар куонкурус түмүктэннэ.
Тэрээһини «Өймөкөөн» кэммиэрчэскэйэ суох уопсастыбаннай тэрилтэ бырабылыанньата тэрийэн ыытта. Бу түмсүү сэттэ чилиэниттэн үһэ — Елена Потоцкая, Тамара Винокурова, Валентина Прокопьева кыраайы үөрэтэр суруналыыс Сергей Егоров үөрэтэн-такайан таһаарбыт айар куттаах дьоннорунан буолабыт. Куонкуруска бэрт элбэх эдэр кэрэспэдьиэн кыттыбыта олуһун үөртэ.
Ордук Г.А. Кривошапкин аатынан Төрүт орто оскуолатын оҕолоро «Хотугу сардаҥа» хаһыаты кытта ыкса сибээстээхтэрэ харахха быраҕыллар. Холобура, Төрүт оскуолатын 8-с кылааһын үөрэнээччитэ Михаил Атласов араас тиэмэҕэ суруйбут дириҥ ис хоһоонноох матырыйааллара хаһыат нүөмэрин аайы баара үөрдэр. Ол да иһин буолуо, Миша тэҥнээҕин булбакка, бириистээх 1-кы миэстэҕэ хаардыы хааман киирдэ. Киниэхэ кытаанах дьүүллүүр сүбэ 3000 солкуобайдаах харчынан бириэмийэни анаата.
2-с миэстэни уонна 2000 солк. бириэмийэни «Северная заря» хаһыат суруналыыһа Юлия Фролова салайар «Ракурс» эдэр кэрэспэдьиэннэр постара ылла. Оҕолор саҥа үөрэх дьыла саҕаланыаҕыттан кэлиҥҥи ыйдарга көхтөөхтүк үлэлээбиттэр.
3-с миэстэни уонна 1000 солк. харчынан бириэмийэни дьүүллүүр сүбэ Давид Канаевка анаата. Кини аҥардас биир эрэ матырыйаалынан «абаанса» быһыытынан суолталаах наҕарааданан бэлиэтэннэ. Тоҕо? Бастатан туран, чөл олоҕу бэркэ сырдаппыт. Иккиһинэн, хаартыската элбэх уонна ирдэбилгэ сөп түбэһэр — дьон хамнана сылдьар, олоҕу хайдах баарынан көрдөрөр «тыыннаах» түһэрии. Өскө оҕо бэйэтин түһэриитэ буоллаҕына — бэртээхэй. Оттон атын киһи буоллаҕына, аатын булгуччу ыйар наада.
Дьүүллүүр сүбэ санаа атастаһыытын анал идэлээх суруналыыс быһыытынан олус сөбүлээтим. Михаил Захаров бу куонкуруска бэйэтинэн анаан ис сүрэҕиттэн кыттыбытын бэлиэтиир тоҕоостоох. Кини кэлиҥҥи сылларга НКО-бут үлэтигэр олохтоохтук кыттыста.
Бастаан баһылыгынан үлэлииригэр кини Сергей Егоров 60 сааһын бэлиэтиир тэрээһиҥҥэ кыттыбыта уонна кыраайы үөрэтээччилэри кытта бииргэ үлэлэһиэх буолбута. Ол санаатын Михаил Михайлович чиэстээхтик толорбута. Кини үлэлиир кэмнэригэр хаһааҥҥытааҕар да кыраайы үөрэтээчилэр ис-истэриттэн арыллан туран хоннохтоохтук үлэлээбиттэрэ, үтүмэн элбэх кинигэ тахсыбыта.
Оттон Ис дьыала министиэристибэтин бэтэрээнэ, Биэрэк-Үрдүттэн төрүттээх Ньургун Кривошапкин эдэр кэрэспэдьиэннэргэ туһаайан, билигин баар кырдьаҕастартан төһө кыалларынан элбэх ахтыыны хомуйаллара буоллар диэн санаатын эттэ.
«Урукку сылларга биһигини учууталларбыт ыал аайы ыыта-ыыта кырдьаҕас дьонтон ахтыы хомуйтара сатыылларын толорор-толорбот икки ардынан эппиэтинэһэ суохтук сыһыаннарбытыттан хомойобун. Төһөлөөх элбэх ахтыы хаалыа этэй? Онон билигин баар кырдьаҕастарбытыттан оҕолору олох араарымаҥ, сорудахта биэрэн, ахтыыларда хомуттаралларыгар көрдөһүөм этэ», — диэн санаатын тиэртэ.
Дьэ, онон кыраайы үөрэтэр Өймөкөөн ытык киһитэ, улахан суруналыыс үбүлүөйдээх сылын дириҥ ис хоһоонноохтук тэрийэн, дьоһуннаахтык түмүктээтибит.
Сахалыы тыллаах «Хотугу сардаҥаны» төрүттээбит Сергей Егоров үбүлүөйүн куонкуруһуттан кынат анньыммыт эдэр кэрэспэдьиэннэр мантан инньэ улуус хаһыаттарын баай матырыйаалынан хаҥаталларыгар ис сүрэхпиттэн эрэнэбин!
Бу туһунан сиһилии “Хотугу сардаҥа” хаһыакка ааҕаарыҥ.
Елена Потоцкая, СӨ үтүөлээх суруналыыһа, Өймөкөөн улууһун Бочуоттаах гражданина, «Саха» НКИХ Үрүҥ көмүс бэлиэтин хаһаайына