Саҥа дьылбытын үөрэ-көтө көрүстүбүт

Халыҥ хаар түспүт,

Маҥан хаар бүрүйбүт,

Тымныы кыһыммыт

Тиийэн кэлбит.

Үрэххэ киириигэ

Чуораан тыаһынан

Тымныы эһэбит

Биһигини көрсүөҕэ.

Саҥа дьыл, саҥа дьыл,

Бу тиийэн кэллэҕэ,

Үөрэ-көтө көрүстүбүт

Биһиги эйиигин!

Бу ырыанан биир ый анараа өттүгэр оҕо-аймах саамай сөбүлүүр, таптыыр-ахтар бырааһынньыкпытын Саҥа дьылы бэлиэтээбиппит. Биһиги оскуолабытыгар олус көрдөөх, үөрүүлээх-көтүүлээх бырааһынньык буолан ааспытын билигин да умнубаппыт.

Бары кылаастар бэйэлэрэ талбыт омуктарын таҥаһын таҥнан-саптан, ол дойдулар үҥкүүлэрин толорбуттарын ыалдьыттар, төрөппүттэр уонна учууталлар ытыс тыаһынан көрсүбүттэрэ.

Бастакы көстүүнэн илиҥҥи кыыллартан Дракон буолбута, быйыл кини сыла буоларынан, бэһистэр үҥкүүлээн-хамсанан, мустубут дьоҥҥо үөрүүнү бэлэхтээбиттэрэ.

Салгыы төрдүс кылаас туроктара үҥкүүнү ситэрэн биэрдилэр, онтон үһүс кылаастар китайскай үҥкүүнэн бырааһынньыгы киэргэттилэр. Ол кэнниттэн иккис кылаас грузинскай үҥкүүгэ көрү-нары салҕаан биэрдэ. Алтыс кылаас испанскай үҥкүүтэ, онтон сэттистэр французскай үҥкүүлэрэ дьон болҕомтотун тарта. Ахсыстар мексиканскай үҥкүүнү көҕүлүттэн туттулар, тохсустар корейскай үҥкүүнү толордулар. Улахан оҕолор — онустар японскай үҥкүүнү бэркэ табыллан толордулар, онтон уон бииристэр бары түмсэн, кинилэргэ устудьуоннуу сылдьар бииргэ үөрэммит оҕолоро кэлэн кыттыһан, бэртээхэй индийскэй үҥкүүнү бэлэхтээтилэр.

Түмүккэ киэҥ-нэлэмэн Россия оҕолоро (бастакы кылаастар) киирэн, көрдөөх-нардаах нууччалыы уоннаманна олохтоох араас норуоттар үҥкүүлэринэн үөрүүлээх тэрээһини түмүктээтилэр.

Биһиэхэ Тымныы Чысхааммыт илэ бэйэтинэн кэлэн үөрэх чулууларыгар, кыайыылаахтарга, бастыҥ кылаастарга бэлэхтэри туттартаан, оҕолору кытта тэҥҥэ хоробуоттаата. Ол кэнниттэн бары өйдөбүнньүк хаартыскаҕа түһэн, төһө да таһырдьа чысхаан тымныы сабардаатар, оскуолабытыгар наһаа сылаас, сырдык, иһирэх Саҥа дьыл буолан ааста.

Түгэнинэн туһанан маннык истиҥ, кэрэ бырааһынньыгы тэрийбит, сүүрбүт-көппүт учууталларбытыгар, үлэһиттэрбитигэр уонна оҕолорго истиҥ махталбытын аныыбыт. Үүммүт 2024 сылга бары доруобай, дьоллоох буолуҥ!

 

Найаана Корякина,

7 кылаас,

Өймөкөөн орто оскуолата