Томтордооҕу Н.М. Заболоцкай-Чысхаан аатынан түмэлгэ самаан сайыны көрсө, Ньукуолун күнүгэр аналлаах «Сайылыкка көһүү» диэн тэрээһин олус сэргэхтик ааста.
Бу күн ытык дьоммут холкуос, сопхуос саҕана сайылыкка көһүү ахтылҕанын истиҥник санастылар. Көмүлүөк оһохтоох балагаҥҥа булт тэриллэрин, сахалыы иһити-хомуоһу, илиинэн эриллэр сэппэрээтэрдэри быыстапкаҕа туруорбуттарын дьон-сэргэ кэрэхсээтэ, сэргээтэ. Ынах, сылгы иитэр үрүҥ илгэ хаһаайыттарыгар үүт, сүөгэй, арыы, быырпах оҥорон атыы дьаарбаҥкатын тэрийдилэр. Онно олохтоохтор Анна Стручкова, Акулина Слепцова, Айталина Иванова, Александра Сивцева, Ньургуйаана Дьячкова кыттыыны ыллылар. Кинилэр кэлбит ыалдьыттары үрүҥ аһынан күндүлээтилэр.
Байанай бэлэҕин куһу, балык эгэлгэтин аҕалан атыыга, бириискэ дэлэччи бэлэх ууммут Н.О. Васильевка, Г.С. Дьячковка бары кэлбит ыалдьыттар ааттарыттан барҕа махталбытын тиэрдэбит.
Бырааһынньык күн сыал ытыыттын күрэҕин Александр Харитонов иилээн-саҕалаан ыытта. Ону тэҥэ «балыктааһын» диэн күөн күрэс оонньуутугар элбэх киһи көхтөөхтүк кытынна. Кыайыылаахтар дьиэлэригэр кус, балык илии тутуурдаах, төнүннүлэр. Сыал ытыытыгар 1-кы миэстэ Евдокия Готовцева, 2-с Владимир Варфоломеев, 3-с ытык миэстэ ыалдьыппыт, Антонина Николаевна Цой (Дьокуускайтан кэлэ сылдьар, Тааттаттан төрүттээх) ылла. «Балыктааһыҥҥа» 1-кы миэстэ Татьяна Заболоцкая, 2-с Александра Сивцева, 3-с миэстэ Тамара Ковлекова уонна Айталина Слепцова буоллулар. Алгысчыт Евдокия Харитонова сайыны көрсүү, алгыс сиэрин-туомун тутуһан арчылаата, ыраастаата.
- Бу тэрээһиҥҥэ Харитоновтар дьиэ кэргэҥҥэ актыыбынай кыттыыны ылбыттарын эҕэрдэлиир тоҕоостоох. Кинилэр өрүү күүс-көмө буолалларыгар түмэл уонна бар дьоммут ааттарыттатан махтал тыллары этэбит, — диир мусуой салайааччыта Айталина Иванова.
Ньукуолун күнүн көрсөр сандалыга алкыйга дэлэччи буспут сахалыы лапсалаах кус миининэн, арыылаах минньигэс алаадьынан, саламаатынан, уохтаах быырпаҕынан күндүлээһин буолла. Бу күн дьон тото-хана аһаан, астынан, дуоһуйа сынньанан, сэһэргэһэн тарҕастылар.
Ыалдьыт буолан кэлбит, тэрээһиҥҥэ сылдьыбыт үөлээннэхтэрбитигэр улахан махталларын тэрийээччилэр тиэрдэллэр. Маны тэҥэ түмэл салайааччытыгар Айталина Ивановаҕа уонна кини көмөлөһөөччүлэригэр махтал бастыҥын олохтоохтор тиэрдэллэр уонна үлэлэригэр ситиһиилэри баҕараллар.
Раиса Березкина,
үлэ бэтэрээнэ, Томтор