Бу күннэргэ Ил Түмэн сэттис ыҥырыылаах сиэссийэтигэр дьокутааттар сис кэмитиэттэринэн тарҕаһар үлэ торумун дьүүллэстилэр, ырыттылар.
Мунньах түмүгүнэн социальнай ситимнэргэ “Арктика улуустарыттан талыллыбыт дьокутааттар тутаах сис кэмитиэттэн куотунан “эттээх” өттүгэр таластылар” диэн ис хоһоонноох видео да, иһитиннэрии да тарҕанна. Биллэн турар, маныаха быйылгы быыбарга элбэх хоту улууһу түмэр Халыма-Индигиир уокуругар Сахамин Афанасьевка уонна Гаврил Алексеевка куоластаабыт Арктика улуустарын олохтоохторо ордук долгуйан уонна айманан ыллылар. Дьиҥэр, атын да хоту улуустарыттан дьокутааттар эмиэ баар бөҕө буоллахтара.
Бу төһө оруннаах иһитиннэрии тарҕана сылдьарын билээри, биир мандаттаах Халыма-Индигиир уокуругар элбэх куолаһы ылбыт норуот дьокутаата Сахамин Афанасьевы кытта билсэн, быһаарыы биэрэригэр көрдөстүбүт.
— Норуот дьокутаата Гаврил Алексеев уонна мин Ил Түмэн сүрүн сис кэмитиэттэригэр чилиэнинэн киирдибит. Бу иннинэ иккиэн, үлэбитин хоһуласпат туһуттан, ким ханнык салааларынан үлэлиирин быһаарсыбыппыт. Биллэн турар, иккиэн суксуруһа сылдьан биир кэмитиэккэ киирбэт буоллахпыт. Онон мин тутуу уонна сокуон, сир сыһыаннаһыытын, айылҕа уонна экология кэмитиэттэригэр, ОДьКХ уонна энэргиэтикэ курдук олоҕу хамсатар кэмитиэттэргэ киирдим. Оттон уопуттаах финансист Гаврил Алексеев үһүс төгүлүн бүддьүөт, нолуок уонна сыана бэлиитикэтигэр, баай-дуол уонна приватизация сис кэмитиэтигэр үлэлиир буолла. Кини тыа сирин уонна аграргнай бэлиитиикэ кэмитиэтигэр эмиэ баар. Гаврил Алексеев, маны тэҥэ, Аҕыйах ахсааннаах норуоттар бэрэстэбиитэллэрин уонна Арктика дьыалаларын сис кэмитиэтигэр үлэлиэҕэ. Бу курдук биир кэмитиэккэ иккиэн “анньыһа” сылдьыбакка, быыбардааччыларбыт интэриэстэрин киэҥ хабааннаахтык туруулаһар инниттэн үгүс кэмитиэккэ хабылла сатаатыбыт. Онон Гаврил Алексеевтыын тэҥинэн уопсайа 6 кэмитиэккэ тахсыылаахтык, көдьүүһү ситиһэрдии үлэлэһиэхпит. Биллэн турар, Аҕыйах ахсааннаах норуоттар бэрэстэбиитэллэрин уонна Арктика дьыалаларын сис кэмитиэтин тустаах үлэтигэр, бары мунньахтарыгар, тэрээһиннэригэр Халыма-Индигиир уокуругар киирсэр хоту улуустар дьокутааттарын быһыытынан, көхтөөх кыттыыны ыларбыт чахчы. Ол биһиги эбээһинэспит да, иэспит да. Оттон атын хоту уонна Арктика улуустарын дьокутааттарын оннугар быһаарыы биэрэр кыаҕым суох. Бэйэбит уокурукпут чааһыгар быһаарыым итинник.
Күндү Өймөкөөн улууһун олохтоохторо! Бары кыһалҕалаах эбэтэр суолталаах туруорсуу боппуруостарга эһигини кытта бииргэ үлэлииргэ бэлэммит. Эһигини кытта сибээстэһэргэ анаан улуустарынан “личнэй прием” дэнэр кыраапыгы олохтуохпут. Онно эһиги биһигини кытта сирэй көрсөн кэпсэтиэххитин сөп. Маны таһынан, улуус аайы Ил Түмэн дьокутаата көмөлөһөөччүлээх буолуоҕа. Онон сибээстээн, ким бу уопсастыбаннай үлэҕэ кыттыһыан баҕалаах дьон, билсиҥ. Миигин “г. Якутск, ул. Ярославского, д.24/1, каб.316, тел.: +74112-43-53-00, эл/почта gs@iltumen.ru” аадырыһынан булуохха сөп. Дьокутаат быһыытынан https://t.me/SakhaMinAfanasiev телеграм-ханаалга күннээҕи үлэбин барытын сырдатан иһиэҕим.
Түгэнинэн туһанан, улуустааҕы дьаһалта пресс-сулууспатыгар, Өймөкөөн улууһун хаһыаттарын эрэдээксийэтин салалтатыгар араас хобдох иһитиннэрии тахсаатын кытта, сөптөөх эппиэти тустаах киһиттэн бэйэтиттэн иһитиннэрии ылан, биир дойдулаахтарыгар тута сырдаппыттарыгар махталбын тиэрдэбин. Ил Түмэн сэттис ыҥырыылаах парламенын дьокутааттарын баһыйар аҥаара – саҥа талыллыбыт дьон. Онон бэйэлэрин биллэриэн баҕалаах дьон үгүһэ чахчы. Оннук буолуохтаах даҕаны буоллаҕа. Мантан инньэ араас саҥа-иҥэ, кэпсэл, кэпсэтии социальнай ситимнэргэ тарҕаныаҕа. Парламент саҥа састааба оннун булуор диэри бу маннык көстүү – күннээҕи олох хаамыыта. Онон бэрэбиэркэлэммит иһитиннэриилэри эбэтэр бэйэҕит талбыт дьокутааттаргыт санааларын “Севернай заря” уонна “Хотугу сардаҥа” улуустааҕы хаһыаттар суруналыыстара кэмиттэн кэмигэр толору иһитиннэрэ олоруохтара. Ол туоһута – бу бүгүҥҥү матырыйаал.
Быыбар иннинээҕи хампаанньа түмүктэнэн, билигин бары бииргэ сомоҕолоһон, уһун, тымныы кыһыммытын олохтоохтук тэринэн көрсөргө бэлэмнэниэҕиҥ. Онуоха көстөр уустуктары биир сүбэнэн этэҥҥэ туоратарга дьулуһуохха, — диэн биир мандаттаах Халыма-Индигиир уокуругар элбэх куолаһы ылбыт норуот дьокутаата Сахамин Афанасьев бэйэтин санаатын тиэртэ.
Өймөкөөн улууһун пресс-сулууспата