Саха Өрөспүүбүлүкэтин Ил Дархана Айсен Николаев 2023 сыл балаҕан ыйын 7 күнүгэр Оһуохай күнүн олохтуур туһунан Ыйаахха илии баттаабыта. Ыйаах Арассыыйа норуоттарын култуураларын үйэлээх баайын эбийиэгин – саха төрүт үҥкүүтүн «Оһуохайы» харыстыыр уонна тарҕатар соруктаах. Оһуохай күнэ сыл аайы ыам ыйын 25 күнүгэр бэлиэтэнэр буолуоҕа.
Сардаана Уйгун, Өймөкөөн орто оскуолатын саха тылын учуутала:
— Оһуохай туһунан кыратык сырдаттахха маннык. Үөрэхтээхтэр суруйалларынан, оһуохай быдан былыр олоҥхо үөскүөн иннинэ сиэри-туому ыһыах ыһыы толорууттан үөскээбит буолуон сөп. Ону таһынан оһуохай итэҕэли кытта ыкса ситимнээх, ол иһин ыһыах уонна оһуохай быстыспат өйдөбүллээхтэр. Билиҥҥи да кэмҥэ биир да ыһыах оһуохайа суох табыллыбат. Оһуохай түһүлгэҕэ кэлэктиибинэн толоруллар буолан, хас биирдии киһи ис эйгэтигэр быһаччы дьайар, киһини көҕүтэр кыахтаах. Оһуохай этээччи тулалыыр эйгэни тута хоһуйан көрөн: араас көстүүнү, ийэ айылҕаны, айылҕа дьиктитин-кэрэтин, уутун-тыатын, отун-маһын, көтөрүн-сүүрэрин тыыннаах хартыына оҥорон киһи хараҕар көстөр гына хоһуйан ыллыыр. Оҕону кыра эрдэҕиттэн оһуохайга тардан ыллыырга үөрэттэххэ, төрөөбүт айылҕатын таптыырга, харыстыырга үөрэнэ иитиллэр. Ыһыах түһүлгэтигэр сааһыттан тутулуга суох дьон, араас көлүөнэ биир ситим, биир сомоҕо буолан бары бииргэ ыллыыллар, үҥкүүлүүллэр.
Оһуохай — сахалар былыргы үҥкүүлэрэ. Сиэри -туому тутуһууну кытта ситимнээх. Былыргы сахалар аан дойдуну көрүүлэрэ бу үҥкүү хамсаныыларын нөҥүө биллэр.
Элбэх киһи эргимтэҕэ туран анал хатыланар хамсаныылары оҥоро-оҥоро уонна ыллыы-ыллыы күн хоту эргийэллэр. Оһуохай үс чаастан турар.
Бу туһунан сиһилии «Хотугу сардаҥа» хаһыакка ааҕаарыҥ.
Мария ГЕРМОГЕНОВА, бэчээккэ бэлэмнээтэ