Өрөспүүбүлүкэ олохтоохторо дойду баһылыгын быыбарыгар көхтөөхтүк кытыннылар. Үс күннээх быыбар түмүгүнэн Саха сиригэр быыбарга Россия президенигэр хандьыдаат Владимир Путин ордук элбэх куолаһы ылла, диэн иһитиннэрдэ СӨ Киин быыбардыыр хамыыһыйата.
Саха сиригэр быыбарга уопсайа 452 366 киһи кыттыыны ылла, ол быыбардааччы уопсай ахсааныттан 71,57 % буолар. Оттон хандьыдааттары барыларын ылан көрдөххө, куоластааһын түмүгэ маннык: Владимир Путиҥҥа 397 051 быыбардааччы (87,79%), Владислав Даванковка – 21 306 (4,73%), Николай Харитоновка – 7968 (4,32%), Леонид Слуцкайга – 7 968 (1,76%) куоластаата.
СӨ Киин быыбардыыр хамыыһыйатын бэрэссэдээтэлэ Евгений Федоров билинэринэн, 2024 сыллааҕы быыбарга дьон кэлиитэ хаһан да буолбатах үрдүк. Холобур, алта сыл анараа өттүгэр бу көрдөрүү 70% этэ. Быйылгы быыбарга бастыҥынан Анаабыр национальнай долган-эбэҥки улууһа, Амма, Дьааҥы, Нерюнгри уонна Бүлүү улуустара буоллулар. Оттон Өлөөн, Анаабыр улуустара 90%-тан тахса быыбардааччы ахсаанын биэрдилэр, 80% – Таатта, Горнай уонна Үөһээ Бүлүү.
Дьокуускай куоракка Владимир Путиҥҥа 82,23% куоластаатылар. Саха сирин 36 быыбардыыр учаастагар быыбардааччылар 100% куоластаабыттара бэлиэтэннэ.
Үс күннээх быыбар кэмигэр Саха сирин дьоно-сэргэтэ бүтүн дьиэ кэргэнинэн, бэл диэтэр, оҕолуун-уруулуун, эдэрдиин-эмэнниин кэлэ сырыттылар.
Саха сирин улуустарын олохтоохторо быыбар күнүгэр бырааһынньык тыынын олохтоотулар. Үгүс дьон учаастактарга национальнай таҥастаах кэлбитэ көрөргө ураты кэрэ буолла.
Быыбар туох да быраабы кэһиитэ суох, сокуоҥҥа олоҕуран ыытылынна, диэн Киин быыбардыыр хамыһыыйа иһитиннэрдэ.
Бары быыбардыыр учаастактарга быраабы араҥаччылааччылар дьуһуурустуба тэрийдилэр, уопсастыбаннай кэтээн көрөөччүлэр, итиэннэ хандьыдааттар анаабыт бэрэстэбииттэллэрэ үлэлээтилэр. Быыбар ыраастык уонна дьэҥкэтик ааста.
СӨ Киин быыбардыыр хамыыһыйатын бэрэссэдээтэлэ Евгений Федоров этэринэн, куоластааһын түмүгүнэн Уһук Илин (Дальний Восток) 11 регионуттан Саха сирэ 5-с миэстэҕэ таҕыста. Бу — үчүгэй көрдөрүү.
Ирина Петрова