Тохсунньу 16 күнүгэр Дьокуускайга «Сахамедиа» холдинг медиакиинигэр «Саха сирэ» хаһыат эрэдээксийэтэ уопсастыбаннай кэрэспэдьиэннэри кытары көрсүһүүнү тэрийдэ. Бу хаһыат биир тутаах үлэһитэ, биллэр суруналыыс Елена Потоцкая этиитин ылынан, мин манна кыттыыны ыллым.
Тэрээһини хаһыат кылаабынай эрэдээктэрэ Александр Тарасов уонна эрэдээктэри солбуйааччы Анивера Акимова иилээн-саҕалаан ыыттылар. Көрсүһүүгэ кэлбит кэрэспэдьиэннэр санааларын үллэһиннилэр, инникитин даҕаны хаһыакка үлэлэһэргэ бэлэмнэрин биллэрдилэр.
«Саха сирэ» хаһыакка быйыл элбэх киһи суруйтарбытыгар суруналыыс Елена Потоцкая уонна улуус уопсастыбаннай кэрэспэдьиэнэ Зиновий Игнатьев улахан өҥөлөөхтөрө бэлиэтэннэ.
Бу тэрээһин туһунан «Саха сирэ» хаһыат 2-с нүөмэригэр (2024 сыл, тохсунньу 19 күнэ) «Хаһыат эрэллээх доҕотторо» диэн ыстатыйаҕа суруналыыс Сардаана Баснаева суруйуутун билсиэххитин сөп.
Наталья Руфова, Хатас культурнай киинин үлэһитэ , «Саха сирэ» хаһыакка кини бөһүөлэгин туһунан 100-н тахса матырыйаал бэчээттэммитин астынан туран кэпсээтэ.
Наталья Мордовская «Саамай киһини долгутар көстүү — хаһыаты эдэр ыччат аахпата уонна барытыгар аһара нууччатымсыйыы баар буолбута. Оннооҕор национальнай гимназияҕа үөрэнээччи үксэ нууччалыы кэпсэтэр. Онон саха тылын туһугар туруулаһан үлэлэһии наада», — диэн тоһоҕолоон бэлиэтээтэ.
«Олоххо сырдык тапталлаах Полина Победа» диэн олус интэриэһинэй ыстатыйа (ааптар Е.Потоцкая) дьоруойа Полина Находкина хайдах хомоҕой тыллаах хоһоонньут буолбутун туһунан кэпсээтэ, мустубут дьоҥҥо хоһооннорун ааҕан иһитиннэрдэ.
Кэпсэтиигэ Елена Прокопьева, Марта Николаева, Максим Ксенофонтов, Вера Владимирова кыттан санааларын эттилэр.
Бу маннык көрсүһүүлэр инникитин даҕаны өссө буолуохтара, бэчээт сайдыытыгар туһаны аҕалыахтара, хаһыат эрэллээх көмөлөһөөччүлэрин — уопсастыбаннай кэрэспэдьиэннэрин ситимнии, сибээстии туруохтара диэн бигэ эрэллээхпит.
Мин республика хаһыаттарыгар суруйбатарбын даҕаны, саайтка кыралаан үлэлэһэбин диэххэ сөп. Мустубут дьоҥҥо «Сылаас тыыннаах тымныы кыраай» диэн ааттаах ыстатыйаларым бэчээттэммит кинигэм туһунан сырдаттым. Бэчээт эйгэтигэр миигин алҕаан киллэрбит, хаһыакка суруйарбар олук уурбут, ытыктыыр киһибин Кэрэспэдьиэн Сэргэй — Сергей Михайлович Егоров туһунан бу көрсүһүүгэ истиҥник ахтан-санаан ааастым.
Сиһилии «Хотугу сардаҥа» хаһыакка ааҕыҥ
Тамара Винокурова,
биһиги общ. корр., Дьокуускай