Соторутааҕыта Томтордооҕу бибилэтиэкэҕэ “Саха саарына, ытык киһибит Юрий Александрович Готовцев” диэн “төгүрүк” остуол бэрт сэргэхтик ыытыллыбытын туһунан Мария Ефимова иһитиннэрдэ.
Тэрээһин биир дойдулаахпыт, биллэр-көстөр судаарыстыбаннай уонна общественнай диэйэтэл Готовцев Юрий Александрович төрөөбүтэ 85 сылыгар ананна. “Төгүрүк” остуолга олохтоох дьаһалта баһылыгын солбуйааччы Айаал Неустроев, тэрилтэлэр салайааччылара, дьокутааттар, Готовцев Ю.А. аймахтара уонна үөлээннээхтэрэ муһуннулар.
Кинилэр икки чаас устата Юрий Александрович дойдутун, өрөспүүбүлүкэтин туһугар оҥорбутун ахтан-санаан, кини быһыытынан үтүө майгылааҕын ахтыһан, бириэмэни билбэккэ хааллылар. Хас биирдии киһи Ю.А. Готовцев туһунан үтүө тыллары этэрдээх буолла.
Түмүккэ “төгүрүк” остуол кыттыылаахтара олохтоох дьаһалта дьиэтигэр мемориальнай дуосканы олохтуур, Томтордооҕу Култуура дьиэтигэр, Томторго уонна Уус-Ньараҕа уулуссаларга кини аатын иҥэрэр туһунан этии киллэрдилэр. Маны тэҥэ Юрий Александрович төрөөбүт түөлбэтигэр Биэрэк-Үрдэ учаастакка өйдөбүнньүк бэлиэ туруорар сөптөөҕүн туһунан санааларын этиннилэр.
Любовь Кривошапкина