Саха омук бэйэтэ туспа, дириҥ силистээх-мутуктаах итэҕэллээх. Бу итэҕэлэ маннык тыйыс эйгэҕэ тыыннаах хааларыгар, олоҕун оҥосторугар төһүү буолбута саарбаҕа суох. Тулалыыр эйгэни, айылҕаны кытары сөп түбэһэр, дьүөрэлэһэр итэҕэллээх. Саха төрүөҕүттэн аан дойдуттан арахсыар диэри эгэлгэ сиэри-туому, үгэһи тутуһар.
Кутталлаах түгэннэри дьүһүйэн көрүү, ол эбэтэр «иччилээн» тыыннааһын олох сөбө суох быһыы-майгы буолар. Айылҕа сайдар аналынан-оҥоһуутунан куһаҕаны ыҥыран, бэйэҕэ, бэйэ эргимтэтигэр тардыныы дэнэр.
Дьиҥэр, аналынан эттэххэ — баҕарбатарбыт да, айылҕа «кистэлэҥ» күүстэрин төттөрү -алдьатар күүһү салайан, саргыны самнарар салгыны хамсатыы – бу билбэттэн сылтаан тахсар. Тустаахха «бэйэни кыраныыга» тэҥнээх буолар. Ол аата куһаҕаны дьүһүйүү — кырыыс.
Туска кутталы туһаайыы-куттас буолууттан тахсар. Бу сиргэ төрүөбүт тус бэйэбитигэр, ыччаттарбытыгар хорсун санаалар үөскэхтэрин иччилээн-тыыннаан ииттинэрбит, иитэрбит-иннибитигэр эрэллээх, итэҕэллээх буолуубут сүрүн түһэ-олоҕо буолар. Табыллыыны тардыныы, дьолу тутуһуу дэнэр.
Киһи санаатынан хорсун уонна чэнчис-ыраас буолара бэйэҕэ көдьүүстээх.
Иннибитигэр үтүөнү ыраланыахха. Кэскиллээҕи кээһиэххэ. Баар баарга барытыгар махталынан, тапталынан эрэ сылдьыахха, сыдьаайыахха.
Тускуну туһаайдым, барҕаны баайдым.
Ойуулаах Уола Өймөкөөн Сэмэнэ