Ийэ тылбыт биһигини төрөөбүт төрүт сирбитин, омукпутун кытта ыкса ситимниир.
Төрүт нэһилиэгэр Төрөөбүт тыл уонна сурук-бичик күнүгэр аналлаах үөрүүлээх тэрээһиннэр буоллулар.
Олунньу 12 күнүттэн саҕалаан кыраайы үөрэтээччи, суруналыыс С.М. Егоров аатынан бибилэтиэкэ уонна Дьоруой Дьарааһын аатынан Төрүт орто оскуолатын бибилэтиэкэтэ кыттыһан «Мин ийэ тылым — саха тыла» диэн ааттаах библиотечнай уруок тэрийдибит.
Бу дьаһалга сахаттан бастакы учуонай-лингвист С.А. Новгородовка аналлаах презентация көрдөрүлүннэ. Маны тэҥэ “Сахалыы сурук-бичик” кинигэлэр, урукку букубаардар быыстапкалара үөрэнээччилэр болҕомтолорун тарта.
Тэрээһиҥҥэ оҕолор С.А. Новгородов бастакы алпаабытынан суруллубут тыллары олус интэриэһиргээн, барытын табатык аахтылар.
Биһиги бу күн алгыстаах алаадьынан оҕолорбутун күндүлээтибит. Кинилэр төрөөбүт тылларын харыстаан, таптаан киэҥ эйгэҕэ тарҕата, сахалыы сайа саҥара сылдьалларыгар, тылбыт — барҕа баайбыт буоларын өрүү өйдүүллэригэр-саныылларыгар баҕаран туран, алгыс тылбыт бастыҥын анаатыбыт.
Нина Чачуа, бибилэтиэкэр, Төрүт.