Россия бэчээтин күнэ

Күндү биһиги бэтэрээннэрбит, уопсастыбаннай кэрэспэндьиэннэрбит, редакциялар кэлэктииптэрэ

уонна биһиги эрэллээх ааҕааччыларбыт, эһигини Россия Бэчээтин күнүнэн эҕэрдэлиибин!

 Саҥа технология үйэтэ үгэннээн турар кэмигэр, биһиги кумааҕы хаһыаппытын ааҕааччыларбытыгар оҥорон-таҥан, суруйан-бичийэн, тупсаран, таһааран тиэрдэ олоробут.  Хаһыат баар, хаһыат тыыннаах. Тугунан да солбуллубат, күндү дьикти ураты бэлэх буолан, ааҕааччытыгар быйыл сылы эргиччи эмиэ тиийэ туруоҕа диэн эрэннэрэбит. Билигин хаһыат барахсаҥҥа туох барыта утары курдук: почта тиэрдэр уустуктара, бэчээттиир тэриллэр эргэриилэрэ, кырааска уонна кумааҕы сыаналарын ыарааһына, ыччат көлүөнэ аахпат, наадыйбат буолуута.  Ол эрэн, маннык ыарахаттары туораан, Сахабыт сирин Ил Дарханын быһаччы өйөбүлүнэн,  норуот депутаттарын өйөбүллэринэн, тылы хараанныыр, дьону түмэр-көҕүлүүр кумааҕы хаһыат олоҕо салҕанар. Хас биирдии улуус хаһыата нэдиэлэҕэ биирдэ тахсар. Күндү ааҕааччыларбыт, кытаатан хаһыаккытын сурутан, төрөөбүт тылбытынан бэйэ хаһыатын ааҕар дьолун өссө да өр сылларга салҕыаҕыҥ.

Ааҕааччыларга хаһыат историятын кэмнэрэ саҕаламмытын сыаналыырга, оттон редакцияҕа – хас биирдии тылы ыйааһыннаан көрөргө ыҥырабын: суруллубут – үйэ-саас суоруллубат.

Биһиги технологиялар үйэлэригэр олоробут, онон ситимнээн редакция үлэтин кэҥэттэ. Социальнай ситимнэргэ эмиэ көхтөөх үлэни ыытар. Статистика көрдөрөрүнэн, күн бүгүн дьон сонуну бастакынан социальнай ситимнэртэн ылаллар. Бэрт кылгас кэмҥэ редакция үлэтин тэтимэ уларыйда. Сонуннар итиилии биһиги Телеграм, ВКонтакте, Одноклассники пабликтарбытыгар тахса тураллар. Манна сурутуҥ, олох тэтимин кытта бииргэ хардыылаан.

Редакция үлэһиттэрэ, суруналыыстар бүгүн олох үөһүгэр сылдьаллар: элбэхтэн туһалааҕын булан, кыһалҕалары быһаарыыга, кэрэни кэрэхсииргэ, улуус дьонун-сэргэтин, олоҕун-дьаһаҕын сырдатыыга, улуус киэҥ эйгэҕэ, дьоҥҥо-сэргэҕэ үөскэтэр өйдөбүллэрин оҥорон таһаарыыга. Быйыл иннибитигэр улахан соруктар тураллар, иһэр сыл элбэх улахан событиеларынан туолуоҕа, саҥа проектары саҕалыыбыт, өссө тупсабыт, кэҥиибит, интэриэһинэй буолабыт!

Күндү редакция үлэһиттэрэ! Эһиэхэ күүрээннээх айар үлэни, саҥа сүүрээннэри, сурутуу уонна көрүү-ааҕыы ахсаана үрдээһинин, саҥа ааҕааччылары уонна көрөөччүлэри баҕарабын!

Дьолу, бөҕө доруобуйаны, уостубат уйгуну, или-эйэни – эһиэхэ хас биирдиигитигэр уонна эһиги дьиэ кэргэҥҥитигэр!

 СӨ «Сахабэчээт» судаарыстыбаннай автономнай тэрилтэ генеральнай дириэктэрэ        

Н.М. СТРУЧКОВА