Оттооһун хаамыыта: Нам улууһа от былаанын бастакынан аһара толордо

Өрөспүүбүлүкэ үрдүнэн, атырдьах ыйын 28 күнүнээҕи туругунан, 408 747 туонна от кэбиһилиннэ. Инньэ гынан, бүттүүн былааннаммыт кээмэйтэн 88,99 бырыһыана туолла. Былырыын баччаҕа 304 787 туонна от турбутун кытта тэҥниир буоллахха, оттооһун хаамыыта таһыччы ордук.

Улуустар бэйэлэрин сирдэригэр-уоттарыгар баар ходуһалар үүнүүлэриттэн, төһөтө-хаччата ууга сыталларыттан эбэтэр курааннаабыттарыттан таһааран сабаҕалааһын оҥорбуттарынан, бүттүүн былаантан 90,86 бырыһыанын толоруохтарын сөп. Онон билгэлэнэр таһым бу тиийэн кэллэ. Ыйааһыҥҥа уурдахха, 42 тыһ. туонна от итэҕэс.

Ол гынан баран, билиҥҥи туругунан, 9 улуус отчуттара сабаҕалаабыт таһымнарын аһардылар. Холобур, үөһээ бүлүүлэр былааннарын 86,08 толорон иһэллэр, оттон сабаҕалааһыннара – 81,18% этэ. Кэбээйи улууһа 10 619 туонна оту бэлэмниир былааннааҕын 9 730 туоннаҕа тиэрдэн, торумнаабыт 81,61 бырыһыанын 10-нан куоһарда (91,63%). Саха сүөһүлээх эбээн бытантайдар 2 395 туоннаттан 870 эрэ туоннатын (36,33%) бэйэлэрин кыахтарынан булунарга сабаҕалаабыттарын 34 туоннанан ордук оттоннулар.

Өрөспүүбүлүкэ сүөһү аһылыгын бэлэмнээһиҥҥэ былааннаах 32 улууһуттан уонна 2 куораттааҕы уокуругуттан от былаанын бастакынан Нам улууһа толордо уонна аһара түстэ (103,19%). Намнар кэннилэриттэн ньурбалар биэтэккэ иккиһинэн тиийэн кэллилэр, былааннарын толороллоругар сүүсчэ туонна хаалла (99,57%). Үһүскэ Олоохуна (Өлүөхүмэ) отчуттара бигэтик иһэллэр (97,86%). Нам улууһун сэргэ бастыҥнарга бу сырыыга 90 бырыһыаннаах кирбиини ааспыт 10 улууһу уонна Дьокуускайы киллэрдибит (инфографикаҕа көр).

Барыта 9 улууска 170 мобильнай биригээдэ холбоон 15 991 туонна оту бэлэмниир былааннаах. Отчуоттанар кэмҥэ 151 биригээдэ итинтэн 12 758 туоннатын (бу сыыппара бүттүүн көрдөрүү иһигэр киирэн сылдьар) кэбистэ. Амма мобильнайдара 3 227, Бүлүү уонна Чурапчы звенолара туһааннааҕынан 2 643 уонна 2366 туонналыы оттонон, инники сылдьаллар.

Сүөһү сүмэһиннээх аһылыгар 23 885 туонна сиилэс угуллуохтааҕыттан отчуоттанар кэмҥэ 43,86 бырыһыана туолан иһэр. Амма улууһун хаһаайыстыбалара 1 900 туонна сиилэһи бэлэмниир былааннаахтарын 100 туоннанан аһардылар (105,26%). Сунтаардар 80,33, өлүөхүмэлэр 76,92 бырыһыанын оҥордулар. Сенажка 12 996 туонна былаан ылыллыбытыттан хаһаайыстыбалар 2 951 эрэ туоннатын суулаатылар. Мэҥэ хаҥаластар 250, дьокуускайдар 200, үөһээ дьааҥылар 120 туонналыы былааннаахтарын толорбуттарын кэннэ Аммаҕа балачча хамсааһын баар: 1 300 туонна былааннарыттан атырдьах ыйын 24 күнүгэр 300 туоннатын суулаабыт буоллахтарына, бу сырыыга 950-ҥа тириэрдэ оҕустулар. Хаҥалас улууһа саамай улахан былааннаах (2,5 тыһ. туонна) эрээри, билиҥҥитэ 200-үн эрэ бэлэмнээтэ.

Василий Никифоров

Читайте дальше