Атырдьах ыйын 7 күнүгэр улуустартан киирбит суһал иһитиннэриилэри түмтэххэ, өрөспүүбүлүкэ үрдүнэн 244 585 туонна от кэбиһиллэн, былааннаммыт кээмэй 53,25 бырыһыана туолла. Итиэннэ оттооһун хаамыыта былырыыҥҥы туһааннаах кэмтэн быдан тэтимнээх: ааспыт сайын баччаҕа 178 108 туонна кэбиһии турбута.
Эрдэтээҥи, атырдьах ыйын 3 күнүнээҕи отчуокка 50 бырыһыаннаах кирбиини 5 эрэ муниципальнай тэриллии аһарбыт эбит буоллаҕына, бу сырыыга кэккэлэрэ лаппа хаҥаата. Ол курдук, ааспыттааҕы көрдөрүүлэриттэн сыҕарыйбатах Абыйы (71,32%), Сатайы (69,81%) уонна балачча улаатыннарбыт Намы (79,03%), Куорунайы (69,48%), Уус Алданы (67,78%) тэҥэ Дьокуускай уонна 9 улуус эбилиннилэр.
Бүлүү сүнньүнээҕи улуустар эгил-тэгил тардыалаһан иһэллэр: Ньурба 59,17, Үөһээ Бүлүү 56,17, Сунтаар 55,90, Бүлүү 54,60 бырыһыаннарын ситистилэр. Арҕаа түбэттэн 52,61 %-наах Ленскэй отчуттара саппай уопсаллар. Илин эҥээргэ Чурапчы 51,97 уонна Уус Маайа 60,06, киин улуустартан Хаҥалас 54,41 уонна ыаллыы Дьокуускай хаһаайыстыбалара 51,32 %-ҥа тириэртилэр. Хотугу улуустар ортолоругар үһүс улахан былааннаах Орто Халыма 56,17 %-ын ылла.
Балары таһынан былааннаах отторун аҥаардатан эрээччилэр элбэхтэр. Бытаарбыттар даҕаны бааллар: Аллараа Халыматтан баччаҕа диэри сибидиэнньэ киирэ илик, Аллайыаха 1,54, Усуйаана 1,56, Эбээн Бытантай 3,84 эрэ бырыһыаннаахтар. Көтө сылдьан ардаан, Мииринэй (10,96%), Өймөкөөн (14,18%), Өлөөн (16,30%), Муома (26,47%) отчуттарын атахтаата. Былырыын баччаҕа Үөһээ Дьааҥы 698, Кэбээйи 1,5 тыһ. туонналыы оттоох буоллахтарына, быйыл туһааннааҕынан 4 215 уонна 4 932 туонна кэбиһиилэнэн, былааннарын аҥаарын чөмчөтөллөрө чугаһаата.
Сиилэстээһиҥҥэ хаһаайыстыбалар саҥа ылсан эрэллэр. Билиҥҥитэ Хаҥалас улууһугар 300, Дьокуускайга 100 туонналыыны уктулар.
Мобильнай биригээдэлэр кумааҕыга эрэ эбиллэллэр. Өрөспүүбүлүкэ 9 улууһугар 172 биригээдэ тэриллибит, кинилэр холбоон 15 991 туоннаны оттуур былааннаахтар. Ол эрээри, отчуоттанар кэмҥэ Амма улууһун 19 биригээдэтэ 1 010, Куорунай 13 биригээдэтэ 490 туонналыы оту кэбистилэр. Орто Халыма соҕотох звенота 30 туоннатынан муҥурданна быһыылаах. Тыа хаһаайыстыбатын министиэристибэтэ үүнэр кыстыкка сүөһүгэ дороххой аһылык хаһаас пуондатын тэрийэр сыаллаах мобильнай биригээдэлэр ороскуоттарын сорҕотун толуйууга 14 мөл. 454 тыһ. солкуобай кээмэйдээх үбү көрөргө торумнуурун санатабыт.
Василий Никифоров