Оскуолатааҕы сыллар – киһи үйэтин-сааһын тухары умнубат, сырдык өйдөбүлү саҕар кэрэ кэм. Киһи буолуу, саха буолуу барыта манна төрүттэнэр, төрөөбүт дойдуга, Ийэ сиргэ, бар дьоҥҥо таптал манна саҕыллар, дьоһун дьон буолан кэрэ олоҕу олорор баҕа санаа манна иитиллэр.
Тыа сирин оскуолаларын учууталлара биллэрбиттэринэн, быйыл 5 оскуолаҕа үрдүкү кылаастарга 63 оҕо үөрэннэ. Онон 9-с кылааһы 38 оҕо, 11-с кылааһы 25 оҕо түмүктээн ОГЭ, ЕГЭ туттарыаҕа.
Алексей Павлуцкай, Г.А. Кривошапкин аатынан Төрүт орто оскуолатын выпускнига,:
— Мин оскуолаҕа үөрэнэрим тухары бүтүн Россиятааҕы таһымнаах олимпиадаларга, научнай-практическай кэмпириэнсийэлэргэ ситиһиилээхтик кыттабын. Быйыл «Лучший молодой профессионал» уонна «Лучший по информатике и ИКТ» диэн наҕараадалары тутан олус үөрбүтүм. Ордук информатика, алгебра, геометрия, физика уруоктарыгар дьаныһан туран дьарыктанабын.
«Эльгинка» үҥкүү ансаамбылыгар кыра эрдэхпиттэн сылдьабын. Быйыл «Будущий дипломат-2024» диэн XVIII республикатааҕы куонкуруска 2-с степеннээх дипломант буолбутум. Ону тэҥэ СӨ, СССР успуордун маастара Д.Д. Прокопьев кэриэһигэр улуустааҕы хайыһарынан сүүрүү 5 төгүллээх кыайыылааҕабын. Ситиһиим манан эрэ муҥурдаммат. «Сонуннар» диэн оскуола иһинэн тэриллибит телебырагырааммаҕа общественнай кэрэспэдиэнинэн уонна видео таҥан оҥоробун. Сөбүлүүр дьарыктарым: волейбол, үҥкүү, уруһуй уо.д.а буолаллар. Биир саастыылаахтарбын успуорду өрө тутуҥ диэн ыҥырыам этэ. Эксээмэҥҥитин этэҥҥэ туттаран, талбыт үөрэххитигэр киирэргитигэр баҕарабын.
Кирсан Винокуров, Т.И. Скрыбыкина аатынан Сордоҥноох орто оскуолатын выпускнига:
— Үөрэхпин бүтэрдэхпинэ мин Дьокуускайдааҕы култуура уонна ускуустуба кэллиэһигэр туттарсыахпын баҕарабын. «Туос Мааска» 25-с республикатааҕы аһаҕас бэстибээл-куонкуруска кыттан, «Бастыҥ эр киһи оруола» диэн улахан наҕарааданы туппутум. Ону тэҥэ «Бастыҥ чинчийээччи» аата ситиһиилээхпин. Былырыын Томторго ыытыллыбыт республикатааҕы Олоҥхо Ыһыаҕын күрэхтэһиитигэр чэпчэки атлетика турнирыгар кыттан кыайбытым. Итини тэҥэ араас таһымнаах куонкурустарга, олимпиадаларга өрүү кыттарга дьулуһабын.
Биһиги учууталларбыт хас биирдии үөрэнээччини кытта уруокка ыкса сибээстээхтик үлэлииллэр. Оскуолабыт саҥа, олус кыраһыабай, хас күн аайы онно үөрэ-көтө үөрэнэ барабын. Волейболунан, футболунан, баскетболунан уонна чэпчэки атлетиканан дьарыктанабын, уруһуйга, үҥкүүгэ сылдьарбын сөбүлүүбүн. Учууталбар Климентина Евгеньевна Винокуроваҕа дириҥ билиини биэрбитигэр махтанабын. Оскуоланы бүтэрэр оҕолорго баҕарыам этэ, талбыт үөрэхтэригэр хайаан да киирэллэригэр. Уонна — дьулууру, тапталы, дьолу.
Снежана Кондакова, П.В. Заболоцкай аатынан Үчүгэй орто оскуолатын выпускницата:
— 11 сыл устата оскуола миэхэ элбэх билиини биэрбитэ. Биһиги оскуолабытыгар «Дьулуур» диэн оҕо общественнай түмсүүтэ баар. Онно оҕолор бары түмсэн араас тэрээһиннэри ыытабыт, кыттабыт. Мин алтыс сылбын волейболунан дьарыктанабын. Улуустааҕы күрэхтэһиилэргэ оскуолабыт аатыттан кыттан мэлдьи кыайыы үктэллээх кэлэбит. Учууталым Николина Владимировна Филиппова көмөтүнэн 5 сыл научнай-практическай үлэнэн дьарыктанабын. Тиэмэм аата — «Редкие бабочки Оймяконского района местности Ньонэгдьи» диэн. Онно Өймөкөөн сирин араас лыах көрүҥнэрин үөрэтэбин, чинчийэбин.
Саас Москваҕа «Леонардо» диэн бүтүн Россиятааҕы айар үлэни көҕүлүүр куонкуруска кыттан, 1 степеннээх дипломант буолбутум.
Биир саастыылаахтарбар баҕарыам этэ ситиһиилэри уонна эксээмэннэрин «4», «5» сыанаҕа туттаран, оскуолаларын этэҥҥэ бүтэрэн, талбыт үөрэхтэригэр киирэллэригэр.
Эрчим Аммосов, Н.О. Кривошапкин аатынан Өймөкөөн орто оскуолатын выпускнига:
— Мин сүрүн сөбүлээн дьарыктанар хайысхам успуорт буолар. Былырыын Уус-Ньараҕа өрөспүүбүлүкэтээҕи «Снежный барс-2023», «Боотур» добровольческай этэрээккэ аналлаах байыаннай-спортивнай оонньуу түһүмэхтэригэр «Бастыҥ хамандыыр» ааты сүкпүтүм.
Былырыын Томторго буолбут «Айыы санаа айана» өрөспүүбүлүкэтээҕи Олоҥхо Ыһыаҕар тойук күрэҕэр уонна научнай-методическай кэмпириэнсийэҕэ олоҥхо тиэмэтинэн кыттыбытым.
СВО-ҕа сылдьар биир дойдулаахтарбыт чугас дьонноругар нэһилиэкпитигэр көмө оҥоһулларыгар мэлдьи кыттыһабын. Быйыл ИДьМ туйгуна, УФ сулууспатын полиция бөлөҕүн үлэһитэ, 2002 с. Үчүгэй орто оскуолатын выпускнига Д.Д. Кривошапкин бирииһигэр «Бастыҥ хамандыыр – 2024» ааты чиэстээхтик ылбытым. Оскуолатааҕы ситиһиилэрим манан бүппэттэр, өссө да бааллар.
Мин үөрэхпин бүтэрдэхпинэ архитектура үөрэҕэр туттарсыам этэ. Эксээмэн сүрүн хайысхаларынан – математика, физика предметтэригэр дьаныһан туран дьарыктанабын. Билии аартыгар, сырдыкка сирдээбит учууталбар Ольга Васильевна Борисоваҕа улахан махталбын тириэрдиэм этэ. Выпускниктарга үрдүк дабайыылары, кыайыылары баҕарабын!
Хаартыскаҕа: Күннэй, уҥаттан төрдүс турар
Күннэй Ядреева, Т.И. Скрыбыкина аатынан Сордоҥноох орто оскуолатын выпускницата:
— Мин дьиэ кэргэммэр иккис оҕонон күн сирин көрбүтүм. «4», «5» сыанаҕа үөрэнэбин. Спортивнай секцияларга мэлдьи көтүппэккэ сылдьабын. Республикатааҕы, улуустааҕы уонна оскуола иһинэн ыытыллар күрэхтэргэ, олимпиадаларга кыттабын. Оскуола уонна нэһилиэк олоҕор актыыбынайдык кыттарга кыһаллабын.
Быйыл Тааттаҕа чэпчэки атлетика күрэҕэр кыттан кэлбитим. Сотору эмиэ волейбол турнирыгар кытта барыахтаахпыт. Үөрэхпин бүтэрдэхпинэ Дьокуускайдааҕы В.И. Гришуков аатынан авиационнай-техническэй колледжка туттарсар санаалаахпын.
Учууталбар Климентина Евгеньевна Винокуроваҕа барҕа махталбын этэбин. Оскуолам бары учууталларыгар – кэнчээри ыччаты үөрэх чыпчаалыгар сирдиир, түбүктээх, сыралаах үлэҕитигэр үрдүктэн үрдүк ситиһиилэри, үчүгэй үөрэнээччилэри баҕарабын. Оскуоланы бүтэрээри сылдьар оҕолорго кытаанах санааны, туохтан да толлубакка иннигит диэки баран иһэллэригэр баҕарабын.
Сиһилии «Хотугу сардаҥа» хаһыакка ааҕыҥ
Евдокия ЕГОРОВА