Бастакы чиэппэрбит түмүктэнэн учууталларга, үөрэнээччилэргэ күһүҥҥү сынньалаҥ саҕаланна. Бастакы чиэппэргэ бэрт элбэх тэрээһин ыытыллыбыта.
Хаҥкы күрэҕэ — сонун тэрээһин
Биһиги нэһилиэкпит оҕолоро бу күрэххэ сибиэһэй салгыҥҥа оонньоон-көрүлээн, хаҥкылаан олус үөрдүлэр-көттүлэр. Ол курдук сааскылыы ылааҥы күннэр тураннар киһи эрэ барыта сэргэхсийдэ.
«Дьулуур» оҕо түмсүүтүн уоланнара Алексей Княжев (8-с кылаас), Виктор Старков (10-с кылаас) хаҥкынан сүүрүүнү тэрийиэххэ диэн этии киллэрбиттэрэ. Ону физическэй култуура учуутала Роберт Егоров өйөөн, алтынньы 17 күнүгэр күрэхтэһии ыытыллыбыта. Уолаттар муус хаарын бэйэлэрэ күрдьэн, ыраастаан бэлэмнээбиттэрэ.
Оҕолор бары бу күрэҕи олус астынныбыт, сүрдээх сэргэх тэрээһин буолла диэн сыаналаатыбыт.
Аҕалар күрэхтэригэр
Соторутааҕыта алын кылаас оҕолоругар аҕаларын кытта күрэхтэһии ыытыллыбыта. Араас түһүмэхтэрдээх сүрдээх тыҥааһыннаах күрэс буолан ааста.
Ол курдук бастаан оҕолоох аҕа интеллектуальнай түһүмэххэ ыйытыктарга хоруйдаабыттара. Онтон эр бэртэрэ хамаанданан арахсан баскетболлаан сүүрдүлэр-көттүлэр. Ол кэннэ скакалкалааһын күрэҕэ ыытылынна. Салгыы аҕалар оҕолорун таҥаһын булан таҥыннарыахтаахтара. Мээчиги былдьаһыы түһүмэҕэ бэрт сытыытык, ыһыылаах-хаһыылаах ааста. Түмүк түһүмэххэ ох саанан ытыыга ким бэргэнэ, табыгаһа быһаарылынна.
Түмүккэ, Геннадий Готовцев кыыһынаан Евалыын «Муҥутуур кыайыылаах» буоллулар.
Иккис бириистээх миэстэҕэ Филипп Захаров уолунаан Витялыын тигистилэр.
Үһүс бириистээх миэстэҕэ Николай Старков уолунаан Арианныын таҕыстылар.
Аҕаларбытыгар махтал бастыҥа буолуохтун, оҕолоргутун өйөөн кэлэн кыттыбыккытыгар, үтүө холобур буолбуккутугар.
Давид Канаев, 9-с кылаас, Өймөкөөн