Үөрэх саҥа дьыла саҕаланна. Улуус төрөппүттэрэ оҕолорун оскуолаҕа атааралларыгар төһө үбү барыылларын билистибит.
Икки уол оҕо үөрэнээччилээх элбэх оҕолоох ийэ Ньургуйаана Дьяконова (Өймөкөөн нэһилиэгэ) этэринэн, кини быйыл уолаттарыгар оскуолаҕа аналлаах таҥаһы-сабы, тэриллэри барытын куйаар ситимин нөҥүө сакаастаан ылбыт.
Уус-Ньара бөһүөлэгин олохтооҕо Ганульяна Прокопьева: “Быйыл оскуолаҕа уолбут Миша барар. Малбытын сороҕун куйаар ситиминэн сакаастаан, аҥаарын маҕаһыынтан, уопсайа 20 тыһ. тахса сууммаҕа атыыластыбыт. Оскуола дьаарбаҥкатын сыаната быйыл үрдээбит диэн бэлиэтээтим», — диэтэ.
Онтон икки кыыс оҕо үөрэнээччилээх ийэ Мария Борисова (Сордоҥноох) этэринэн, быйылгы оскуола дьаарбаҥкатын тэрээһинэ үчүгэй эрээри, сыаната былырыыҥҥытааҕар балачча үрдээбит.
— Дьаарбаҥкаттан кыргыттарбар дьууппа, куопта, жилет ыллыбыт, ортотунан 10 тыһ. солк бараатыбыт, — диэн кэпсээтэ ыал ийэтэ.
Ольга Скрыбыкина