Баһылык Альберт Вензель этэринэн, нэһилиэккэ кыстыкка бэлэмнэнии үлэтэ өрүүтүн былааннаахтык барар.
Тыа хаһаайыстыбатын бородууксуйатын оҥорон таһаарааччылар балаҕан ыйын 16 күнүнээҕи туругунан 485 тонна оттоохтор, уопсай былаан 600 этэ. Манна оттооһун былаанын толоруу бырыһыана 80,8 тэҥнэстэ.
Альберт Николаевич былаан быһыытынан бөһүөлэк иһинээҕи суолу-ииһи оҥорбуттарын, бөҕү-сыыһы ыраастаабыттарын туһунан сырдатта, ыһыахтыы барар сирдэрин диэки быраҕыллыбыт эргэ хотоннору көтүрэн сыбаалкаҕа таһаарар сорук баарын туһунан кэпсээтэ.
— Куйдуһун үрэҕи туоруур муоста тутуллуоҕуттан биһиги нэһилиэкпит дьоно-сэргэтэ улаханнык абыранна. “Тупсаҕай суол – олох олуга” диэн мээнэҕэ этиллибэт. Дойду бэрэсидьиэнэ Владимир Путин бу сытыы боппуруоска эмиэ ураты болҕомтотун ууран, Саха сиригэр “Куттала суох уонна хаачыстыбалаах айан суоллара” нацбырайыак чэрчитинэн киэҥ далааһыннаах үлэ ыытыллар, — диэн бэлиэтиир аҕа баһылык. — Ол курдук «Өймөкөөн» өрөспүүбүлүкэтээҕи суолтан Сордоҥноох нэһилиэгэр диэри 32 км усталаах суолбутун өрөмүөннүүргэ балайда үлэ барда.
— Нэһилиэккэ дьон-сэргэ сылаалаах үлэ кэнниттэн сынньанарыгар болҕомто ууруллар. Ол курдук сотору кэминэн Сордоҥноох олохтоохторо саҥа тахсар киинэлэри бэйэлэрин нэһилиэктэрин административнай-култуурунай киинигэр көрөр кыахтаныахтара.
Ол курдук нэһилиэккэ “ЭкстраСинема” диэн киинэ көрдөрөр цифровой платформаны ыллыбыт, — диэн үөрэ-көтө иһитиннэрдэ аҕа баһылык А.Н. Вензель.
Любовь Кривошапкина